రైతుల ఆదాయం పెంచేందుకు కొత్త ఆవిష్కరణలు అవసరమని తెలంగాణ వ్యవసాయ శాఖ మంత్రి పోచారం శ్రీనివాస్ రెడ్డి అన్నారు. పటాన్‌చెరు ఇక్రిశాట్లో ఇన్నోవేషన్ హబ్ – ఐహబ్‌ను సోమవారం ఐటీ శాఖ మంత్రి కల్వకుంట్ల తారకరామారావుతో కలిసి ఆయన ప్రారంభించారు. స్థానిక ఎమ్మెల్యే మహిపాల్రెడ్డి, ఇక్రిశాట్ డీజీ డేవిడ్ బర్గ్ విన్సన్, శాస్త్రవేత్తలు హాజరయిన ఈ కార్యక్రమంలో మంత్రి పోచారం మాట్లాడుతూ దేశంలో 70 శాతం మంది రైతులుంటే అదే అమెరికాలో 1 శాతం మంది రైతులున్నారు. వ్యవసాయాన్ని పండుగలా మార్చేందుకు తెలంగాణ రాష్ట్ర ప్రభుత్వం చర్యలు తీసుకుంటుందని, సీఎం కేసీఆర్ రైతుల శ్రేయస్సు దృష్టిలో ఉంచుకుని సంక్షేమ కార్యక్రమాలు చేపడుతున్నారని తెలిపారు. ఐహబ్‌లో రైతులకు ఎంతో ప్రయోజనం చేకూరుతుందని మంత్రి కేటీఆర్ అన్నారు. తెలంగాణలో ఇక్రిశాట్ ఉండటం గర్వకారణమని, వ్యవసాయంలో టెక్నాలజీని వాడుకుంటున్నామని, సామాన్యూడికి టెక్నాలజీని చేరువచేస్తున్నామని తెలిపారు. రాష్ట్రంలో చాలా మందికి వ్యవసాయమే జీవనాధారమన్నారు.