గుంటూరు, అక్టోబబర్ 5 (న్యూస్‌టైమ్): వడ్డేశ్వరంలోని కేఎల్ విశ్వవిద్యాలయంలో మంత్రులు, ఎంపీలు, ఎమ్మెల్యేలంతా విద్యార్థులుగా మారారు. కంప్యూటర్లు, ట్యాబ్‌లు చేతపట్టి కఠోర సాధనలో పాల్గొన్నారు. సాంకేతికతను అందిపుచ్చుకోవాలన్న అధినేత, ఆంధ్రప్రదేశ్ ముఖ్యమంత్రి నారా చంద్రబాబునాయుడు పిలుపు మేరకు తెలుగుదేశం నాయకులకు జరుగుతున్న శిక్షణ తరగతుల్లో  నియోజకవర్గాల వారీగా కోర్ డ్యాష్ బోర్డు వినియోగం, కైజాలా ఉపయోగాలపై శిక్షణ ఇచ్చారు. మూడు రోజుల తెలుగుదేశం రాజకీయ శిక్షణా తరగతులు, కార్యగోష్టి కార్యక్రమాలు రాష్ట్రంలోని మంత్రులు, శాసనసభ్యులు, ఎంపీలు, రాజ్యసభ సభ్యులు హాజరై సందడి చేశారు.

కేఎల్‌యూలో ఏర్పాటు చేసిన ప్రత్యేక ఆహ్వాన ద్వారం నుంచి బుధవారం ఉదయం 9 గంటల నుంచి 11:30 గంటల వరకు ప్రజాప్రతినిధులు విచ్చేశారు. ద్వారం వద్ద వాహనాలు దిగి సమావేశ మందిరం వరకు నడిచి వెళ్లారు. నడిచే ఇబ్బందులు ఉన్న కొందరు ప్రజాప్రతినిధుల వాహనాలు మాత్రం సమావేశ మందిర సమీపం వరకు అనుమతించారు. కొందరు ఎంపీల వాహనాలను ఆపని పోలీసులు ఎమ్మెల్యేలు, ఎమ్మెల్సీల వాహనాలను ఆపి నడిచి వెళ్లడమేమిటని ఎమ్మెల్సీ పయ్యావుల కేశవ్‌ ఆగ్రహం వ్యక్తం చేశారు.

పార్టీ దృష్టిలో ప్రజాప్రతినిధులందరూ ఒక్కటేనని చెప్పారు. 11:15 గంటలకు ముఖ్యమంత్రి నారా చంద్రబాబునాయుడు హెలికాప్టరులో కేఎల్‌యూకి వచ్చి అక్కడి నుంచి సమావేశ మందిరానికి విచ్చేసి రెండో రోజు కార్యక్రమాలను జ్యోతి ప్రజ్వలన చేసి ప్రారంభించారు. వేదికపై సీఎం చంద్రబాబునాయుడు, కేంద్ర పౌర విమానయాన శాఖ మంత్రి పూసపాటి అశోక్‌ గజపతిరాజు, రాష్ట్ర మంత్రులు నిమ్మకాయల చినరాజప్ప, కేఈ కృష్ణమూర్తి, యనమల రామకృష్ణుడు, ఎమ్మెల్సీ సోమిరెడ్డి చంద్రమోహనరెడ్డి, పయ్యావుల కేశవ్‌, చీఫ్‌ విప్‌ కాల్వ శ్రీనివాసులు ఆశీనులయ్యారు. ముఖ్యమంత్రి చంద్రబాబునాయుడు సుమారు రెండు గంటలసేపు వేదికపై ప్రసంగించిన తీరు ఆకట్టుకుంది.

నదుల అనుసంధానం, పట్టిసీమ, పోలవరం ప్రాజెక్టులు, ప్రాధికారిత సర్వే, కేంద్ర ప్రభుత్వ ప్యాకేజీ అంశం, రాయలసీమకు నీరు, ప్రాజెక్టుల వివరాలు, సీఎం డ్యాష్‌బోర్డు ఏర్పాటు, రాజధాని నిర్మాణం, రాష్ట్రానికి పెట్టుబడులు, భవిష్యత్తులో 2050 కల్లా ప్రపంచంలోనే ఏపీ అగ్రగామిగా ఉండాలని, ఆయా జిల్లాల అభివృద్ధి అంశాలపై ప్రసంగించినప్పుడు ప్రజాప్రతినిధులు కరతాళ ధ్వనులు చేశారు. ప్రతి ఒక్కరూ వినూత్నంగా ఆలోచిస్తూ టెక్నాలజీని వాడుతూ ప్రజల్లోకి వెళ్లి సంక్షేమ పథకాలు అందరి దరి చేరేలా కృషి చేస్తే తిరుగుండదంటూ చేసిన ప్రసంగం ఆకట్టుకుంది.

మరోవైపు, తెదేపా అధినేత చంద్రబాబునాయుడు తనదైన శైలిలో మరోమారు విపక్షాలపై విర్శలతో విరుచుకుపడ్డారు. ప్రతిపక్షానికి ఇన్నోవేషన్ తెలియదని ఎద్దేవాచేశారు. ప్రతిపక్షానికి అవినీతి తప్ప అభివృద్దిలో ఇన్నోవేషన్ ప్రక్రియ గురించి తెలియదని ఆయన అన్నారు. ఒక ఆలోచన ప్రపంచాన్నే మార్చి వేస్తుందని చంద్రబాబు అన్నారు. తరతరాలుగా కరువుతో ఉన్న రాయలసీమ జిల్లాలను దానినుంచి విముక్తి చేయడానికి ఒక ఆలోచన ఉపయోగపడిందని ఆయన అన్నారు. రెయిన్ గేజీ ద్వారా వర్షపాతం, ఫిజియోమీటర్ల ద్వారా భూగర్భ జల మట్టం తెలుసుకోవడం సాంకేతిక పరిజ్ఞానం ద్వారానే సాధ్యమని ఆయన అన్నారు. ప్రస్తుతం వ్యర్ధ పదార్దాల నుంచి కూడా సంపద సృష్టిస్తున్నారని ఆయన అన్నారు. టెక్నాలజీలో ముందుంటే ప్రపంచం అంతా మన ముందు ఉంటుందని చంద్రబాబు అన్నారు.

శిక్షణ తరగతులకు నాయకులు వచ్చి నేర్చుకోవడంపై ఆయన హర్షం వ్యక్తం చేశారు. తరతరాలుగా కష్టపడుతున్న సీమ జిల్లాలను కరవు నుంచి విముక్తి చేయడానికి ఒక ఆలోచన దోహదపడిందన్నారు. శిక్షణా తరగతులకు ఇంతమంది నాయకులు విచ్చేసి విద్యార్ధులుగా మారి నేర్చుకోవడం చూస్తుంటే ఎంతో ముచ్చటేస్తోందన్నారు. అలాగే రెయిన్ గేజీ ద్వారా వర్షపాతం, ఫిజియో మీటర్ల ద్వారా భూగర్భజల మట్టం తెలుసుకోవడం టెక్నాలజీ ద్వారానే సాధ్యంమన్నారు. టెక్నాలజీలో ముందుంటే ప్రపంచం మొత్తం మన ముందుంటుందని, గతంలో వేస్టును వేస్టు అనుకునేవారని, ప్రస్తుతం వేస్టు నుంచి వెల్త్ సృష్టిస్తున్నారని, ప్రస్తుతం వేస్టు టు ఎనర్జీ అనేది యూనివర్సల్ కాన్సెఫ్ట్ అయ్యిందన్నారు. గతంలో వృధాగా భావించే చెత్త నుంచి విద్యుత్‌ తయారు చేయడం ఒక ఇన్నోవేషన్ అన్నారు.

రాష్ట్రంలో 10 ఇన్నోవేషన్ ప్లాంట్లను నెలకొల్పుతున్నామన్నారు. కాగా, అప్‌డేట్ కాలేని వారు అవుట్ డేట్ అవుతారని చంద్రబాబునాయుడు పేర్కొన్నారు. ప్రతి ఒక్కరూ నిత్యవిద్యార్ధేనని నిరంతరం నేర్చుకోవాలన్నారు. మనం అనుకున్నది జరుగుతుందా? అనే పరిస్టితి నుంచి అనుకున్న ప్రతిదీ జరిగే పరిస్థితి తెచ్చామన్నారు. ప్రస్తుత ప్రపంచంలో ఇన్నోవేషన్‌దే ప్రధాన భూమిక అని, ఒక ఆలోచన ప్రపంచగతినే మార్చేస్తుందన్నారు. ఇందుకు అమెజాన్, ఉబర్ యాప్‌ల విజయమే ఉదాహరణ అని చంద్రబాబు పేర్కొన్నారు.

అలాగే ఫైబర్ గ్రిడ్ కేవలం రూ.300 కోట్లతో పూర్తిచేయడం ఒక ఇన్నోవేషన్ అని, అండర్‌గ్రౌండ్‌ కేబుల్‌ వేస్తే రూ3వేల కోట్లు అయ్యేదని, అదే కరెంటు స్తంభాలపై వేసి రూ.300 కోట్లతో పూర్తిచేశామన్నారు. అలాగే జనవరి 3న తిరుపతిలో జరిగే సైన్స్ కాంగ్రెస్ సదస్సుకు ప్రధాని నరేంద్ర మోదీ వస్తున్నారని, ఆలోపు అన్ని విశ్వవిద్యాలయాల్లో వైఫై సౌకర్యం కల్పిస్తామన్నారు. అలాగే రెయిన్ గన్ టెక్నాలజీ ద్వారా రక్షక తడులిచ్చి పంటలు కాపాడటం ఒక ఇన్నోవేషన్‌ అని చంద్రబాబు పేర్కొన్నారు. ఇదిలావుండగా, పార్టీ నాయకత్వ సాధికారత సదస్సు రెండో రోజులో భాగంగా, కంప్యూటర్ ల్యాబ్‌లో సీఎం డ్యాష్ బోర్డు, కైజాలా యాప్‌పై శిక్షణ ఇచ్చారు.

వర్శిటీలోని టెక్ విద్యార్థులు చెబుతుంటే నేతలంతా బుద్ధిగా వింటుండటం, తమకు వచ్చిన అనుమానాలను వెంటనే నివృత్తి చేసుకుంటూ ఉండటాన్ని గమనించిన చంద్రబాబు సాంకేతికతను అందిపుచ్చుకునేందుకు నాయకులు విద్యార్థులుగా మారి పాఠాలు నేర్చకోవడాన్ని చూస్తుంటే తనకు ముచ్చటేస్తోందని వ్యాఖ్యానించారు. నాయకులకు సాంకేతికత శిక్షణపై ముఖ్యమంత్రి స్వయంగా కంప్యూటర్ పాఠాలు బోధించారు. ఇప్పుడు నడుస్తున్న కాలంలో నూతన ఆవిష్కరణలదే ప్రధాన భూమికని, ఒక ఆలోచన ప్రపంచగతిని మార్చేస్తుందని అన్నారు. రాష్ట్రంలో జరుగుతున్న అభివృద్ధి విపక్షాలకు కనిపించం లేదని విమర్శించారు.