ఏలూరు: పశ్చిమ గోదావరి జిల్లాలో కోడిపం దాలపై జిల్లా కలెక్టరు ఆరా తీసారు. కోడిపందాలు జరగకుండా మండలస్ధాయిలో పటిష్టమైన కమిటీలను ఏర్పాటు చేసినప్పటికీ జిల్లాలో కోడిపందాలు జోరుగా జరుగుతున్నట్లు మీడియాలో ఆధారాలతోసహా రావడంతో కలెక్టరు సీరియస్‌ అయ్యారు. ఈవ్యవహారంపై కలెక్టరు స్పందిస్తూ పశ్చిమ గోదావరి జిల్లాలో కోడిపందాలు ఎందుకు జరిగాయో వాటిని ఎందుకు నిరోధించలేకపోయారో వివరణ కోరుతూ జిల్లా యస్‌పి భాస్కర్‌ భూషణ్‌తో సహా పలువురు తహశీల్ధార్లకు సంజాయిషీ నోటీసులు జారీ చేస్తున్నట్లు చెప్పారు.

స్ధానిక కలెక్టరు కార్యాలయంలో సోమవారం జిల్లా అధికారుల సంప్రదింపుల కమిటీ సమావేశంలో కలెక్టరు వివిధ అంశాలపై సమగ్రంగా చర్చించి తగు నిర్ణయాలు తీసుకున్నారు. జిల్లాలో ఎక్కడెక్కడ కోడిపందాలు జరిగాయో సంబంధిత సమాచారంతో పాటు ఆయా తహశీల్ధార్లకు సంజాయిషీ నోటీసులు జారీ చేయాలని కలెక్టరు డిఆర్‌ఓ కట్టా హైమావతిని ఆదేశించారు. స్పష్టమైన ఆదేశాలు ఇచ్చినప్పుడు ఎందుకు అమలు చేయలేదని 144వ సెక్షన్‌ విధించినప్పుడు కోడిపందాలు ఎలా జరుగుతాయని కలెక్టరు ప్రశ్నించారు.

3 రోజులు సంప్రదాయబద్ధంగా సంక్రాంతి సంబరాలు జరుపుకోవాలే తప్ప కత్తులుగట్టి కోడిపందాలు జోరుగా జరుగుతుంటే మండల స్ధాయి కమిటీలు ఏమి చేసాయని భాస్కర్‌ ప్రశ్నించారు. చంద్రన్న బీమా పధకం పేదలకు ఎంతో బాగుందని దురదృష్టవశాత్తు బీమాపధకంలో చేరిన వ్యక్తి ప్రమాదవశాత్తు మరణిస్తే 7 రోజుల్లో బీమాపరిహారం అందించాలని ఈమేరకు వివిధ శాఖలు సమన్వయంతో పనిచేయాలని కలెక్టరు ఆదేశించారు. మరణ ధృవీకరణ పత్రం, పోష్టుమార్టం రిపోర్టు, లీగల్‌ హైయిర్‌, తదితర సర్టిఫికెట్ల పేరుతో ప్రజలను ఇబ్బందులపాలు చేయవద్దని పశ్చిమ గోదావరి జిల్లావాసి ఇతర జిల్లాల్లో రాష్ట్రాల్లో రోడ్డు ప్రమాదాలలో మరణిస్తే డెత్‌ సర్టిఫికెట్‌, పియం సర్టిఫికెట్‌ తక్షణం వచ్చేలా ఆయా జిల్లా కలెక్టర్లతో తాను మాట్లాడతానని ఎక్కడాకూడా చంద్రన్న బీమా పరిహారం అందించడంలో జాప్యానికి తావు లేదని భాస్కర్‌ స్పష్టం చేసారు.

మీ-సేవా కేంద్రాలు ద్వారా దరఖాస్తు చేసుకున్న ప్రజలకు సకాలంలో సేవలు అందించడంలో నిర్లక్ష్యం వహించిన ట్రాన్స్‌కో 7 వేల రూపాయలు పెనాల్టీ సాయంత్రంలోగా చెల్లించాలని లేని పక్షంలో పెనాల్టీ ప్రతీరోజూ వసూలు చేస్తామని భాస్కర్‌ స్పష్టం చేసారు. జిల్లాలో మీ-కోసం, మీ-సేవా, జన్మభూమి, తదితర అంశాలలో ప్రజల దరఖాస్తులను క్షుణ్ణంగా పరిశీలించి పరిష్కరించాలని అలాపరిష్కరించకపోతే ఆయా శాఖల అధికారులు పెనాల్టీ చెల్లించాల్సి ఉంటుందని పెనాల్టీకూడా చెల్లించకుండా నిర్లక్ష్యంగా వ్యవహరిస్తే ఆయా శాఖల అధికారుల జీతాలబిల్లులు నిలుపుదల చేస్తామని కలెక్టరు స్పష్టం చేసారు.

ప్రతీ ప్రభుత్వ కార్యాలయంలో జిల్లా అధికారి జీతంబిల్లు వేరుగానూ, ఇతర సిబ్బంది జీతంబిల్లు వేరుగానూ ట్రజరీలకు సమర్పించాలని కలెక్టరు ఆదేశించారు. అధికారులలో క్రమశిక్షణ లేకపోతే ఎలా? విధించిన పెనాల్టీ కట్టకపోతే కుదరదని ప్రజాసమస్యలు సకాలంలో పరిష్కరించాలని పదేపదే చెబుతున్నప్పటికీ నిర్లక్ష్యం ఏమిటని కలెక్టరు ప్రశ్నించారు. పశ్చిమ గోదావరి జిల్లాలో ప్రజాసమస్యల పరిష్కారానికి అత్యంత ప్రాధాన్యత ఇచ్చామని జిల్లాలో ఫిర్యాదుచేసిన ఏ పౌరుడికీ అన్యాయం జరగకూడదని అందుకే ఫిర్యాదుదారుడితో అధికారి సెల్ఫీ తీసుకుని అతని సమస్యను పూర్తి స్ధాయిలో అవగాహన చేసుకుని పరిష్కరించడానికి శ్రద్ధ వహించాలని కలెక్టరు జిల్లా అధికారులను ఆదేశించారు.

ఏ సమస్య ఫిర్యాదుదారుడు ప్రస్తావించారో దానిపై అధికారి తీసుకున్న చర్య, తదితర సమగ్ర సమాచారంతోపాటు సెల్ఫీ ఫొటో విధిగా ఆన్‌లైన్‌లో పొందుపరచాలని భాస్కర్‌ స్పష్టం చేసారు. జన్మభూమిలో 57 వేల 21 ప్రజాఫిర్యాదులు అందాయని వాటిల్లో ఎక్కువుగా గృహనిర్మాణం, పెన్షన్లు, రేషన్‌ కార్డులు, రోడ్డులు, తదితర అంశాలు ఉన్నాయని వాటన్నింటినీ క్షుణ్ణంగా పరిశీలించి పరిష్కరించాలని జిల్లా స్ధాయి అధికారుల పరిధిలో 400 సమస్యలు వచ్చాయని ఆసమస్యలు 38 మంది జిల్లా అధికారులు పరిష్కరించాల్సి ఉంటుందని ప్రతీ అధికారీ వ్యక్తిగతంగా శ్రద్ధవహించి ప్రజాఫిర్యాదులను పరిష్కించడానికి కృషి చేయాలని భాస్కర్‌ చెప్పారు.

జిల్లాలో గత రెండేళ్ల నుండి ఇ-ఆఫీస్‌ విధానాన్ని అమలు చేయాలని పదేపదే చెబుతున్నప్పటికీ అధికారుల్లో ఇంకా పూర్తి స్ధాయి అవగాహన రాలేదని ఇప్పటివరకూ 5.23 లక్షల ఫైల్స్‌ను ఆన్‌లైన్‌లో పొందుపరిచారని అయితే ఇక్కడ సంఖ్య ముఖ్యంకాదని ఫైల్స్‌లో నాణ్యత ప్రధానమని ఏఫైలు ఎలా ప్రారంభించాలో దానిని ఆన్‌లైన్‌లో ఎలా పొందుపరచాలో స్పష్టమైన అవగాహన అధికారులకు ఉండాలని సెలవుపెడితే ఒక ఫైలు, మళ్లీ సెలవుపెడితే మరొక ఫైలు ఫైల్స్‌ పెంచుకోవడం వలన ఫలితం ఉండదని సెలవులకు సంబంధించి ఒకే ఫైలు నిర్వహించాలని అదేవిధంగా వివిధ శాఖల్లో దిగువుస్ధాయి అధికారులకు ఇచ్చే ఆదేశాలు తదితర అంశాల విషయంలో ఫైళ్ల నిర్వాహణ ఎలా ఉండాలనే విషయంపై త్వరలోనే ఒక అవగాహనా సదస్సును నిర్వహిస్తామని భాస్కర్‌ చెప్పారు.

జిల్లా కలెక్టరుకు చెప్పకుండా కొంతమంది అధికారులు సెలవుల్లో ఇష్టానుసారం జిల్లా విడిచి వెళ్లిపోతున్నారని ఇది మంచి పద్ధతి కాదని జిల్లా విడిచి వెళ్లేముందు ఖచ్చితంగా కలెక్టరు అనుమతి పొంది తీరాల్సిందేనని, ఈ విషయంలో నిర్లక్ష్యంగా వ్యవహరిస్తే చర్యలు తీవ్రంగా ఉంటాయని కలెక్టరు హెచ్చరించారు. జిల్లాలో బయోమెట్రిక్‌ హాజరు, ఇ-ఫైలింగ్‌ విధానం అమలుతీరును పర్యవేక్షించడానికి 2 బృందాలను ఏర్పాటుచేయాలని ఇ-ఫైలింగ్‌ విధానంలో ఏఅధికారి తప్పటడుగులు వేస్తున్నారో ఈబృందం గుర్తించి తనకు నివేదిక సమర్పించాలని, అదేవిధంగా జిల్లాలో ప్రభుత్వోద్యుగులు, అధికారులు ఎక్కడపడితే అక్కడ ఇష్టానుసారం హాజరు వేసే విధానం మంచిదికాదని కొంతమంది ఇతర ప్రాంతాలలో నివాసముంటూ, రైళ్లలో, బస్సులో వచ్చి సమీపంలోని కార్యాలయాల్లో హాజరు వేసి తిరిగి వెళ్లిపోతున్నారని దీనివలన బయోమెట్రిక్‌ లక్ష్యమే దెబ్బతింటుందని కలెక్టరు చెప్పారు.

ఆయా ప్రభుత్వ కార్యాలయ సిబ్బంది పనిచేసే చోటే హాజరు వేయాలని ఏదైనా పనిమీద ఇతర ప్రాంతాలకు వెళితే అక్కడ హాజరు వేయాలని అంతేతప్ప ఎ వరికివారు ఇష్టానుసారం బయోమెట్రిక్‌ హాజరు వేస్తే ఇకపై అటువంటివారి వివరాలను ఆన్‌లైన్‌లో సేకరించి తగు చర్యలు తీసుకుంటామని కలెక్టరు హెచ్చరించారు. వైద్యఆరోగ్యశాఖ ఇప్పటికే స్పష్టమైన ఆదేశాలు జారీ చేసిందని బయోమెట్రిక్‌ హాజరు ద్వారా జీతాల చెల్లింపు విధానం ప్రవేశపెట్టారని భవిష్యత్తులో అన్నీశాఖలకు ఈఆదేశాలు వస్తాయని కావున ప్రతీ ఒక్కరూ బయోమెట్రిక్‌ హాజరు విధానాన్ని పటిష్టవంతంగా అమలు చేయాలని కలెక్టరు అధికారులను ఆదేశించారు.

ఈ సమావేశంలో జాయింట్‌ కలెక్టరు పులిపాటి కోటేశ్వరరావు, అడిషినల్‌ జేసీ షరీఫ్‌, డిఆర్‌ఓ కట్టా హైమావతి, గృహనిర్మాణశాఖ పిడి శ్రీనివాసరావు, డిఆర్‌డిఏ పిడి కె. శ్రీనివాసులు, డ్వామా పిడి ముళ్లపూడి వెంకటరమణ, డియంహెచ్‌ఒ డాక్టర్ కోటేశ్వరి, డిసిహెచ్‌యస్‌ డాక్టర్ శంకరరావు, భూసేకరణ అధికారి ఆర్‌వి సూర్యనారాయణ, డిఇఓ మధుసూధనరావు, తదితరులు పాల్గొన్నారు.