ఉత్తర అమెరికా తెలుగు సంఘం (తానా), పొట్టిశ్రీరాములు తెలుగు విశ్వవిద్యాలయం ఆధ్వర్యంలో ఈ ఏడాది నుంచి అమెరికాలో తెలుగు భాషకు సంబంధించిన పలు కోర్సులను ప్రవాసాంధ్రులకు అందించనున్నారు. తెలుగును పాఠ్యాంశంగా నాలుగు సంవత్సరాల పాటు బోధించే ఈ కార్యక్రమానికి తానా అధ్యక్షుడు నన్నపనేని మోహన్‌, మాజీ అధ్యక్షుడు తోటకూర ప్రసాద్‌ల నేతృత్వంలో సంస్థ సహకారం అందిస్తుందని తానా తెలుగు భాషా వ్యాప్తి కమిటీ అధ్యక్షుడు యార్లగడ్డ శివరాం తెలిపారు.

శుక్రవారం ఆయన తెలుగు విశ్వవిద్యాలయ ఉపకులపతి ఆచార్య ఎల్లూరి శివారెడ్డి, రిజిస్ట్రార్‌ ఆచార్య కె.ఆశీర్వాదం, అంతర్జాతీయ తెలుగు కేంద్రం సంచాలకులు ఆచార్య డి.మునిరత్నం నాయుడులను కలిసి కోర్సు ప్రణాళికకు సంబంధించి పలు అంశాలపై చర్చించారు. ఈ కోర్సులు విజయవంతం కావటానికి సంస్థ తరఫున అన్ని విధాల తోడ్పాటును అందిస్తామని శివరాం తెలిపారు.