కరీంనగర్, సెప్టెంబర్ 21 (న్యూస్‌టైమ్): భారీ వర్షాల వల్ల ఏర్పడిన వరదలకు ఎస్‌ఆర్‌ఎస్పీ కెనాల్‌ తెగిపోయిన పనులను వేగవంతంగా పూర్తి చేసి రైతుల పంటలకు నీరందించే చర్యలు చేపట్టాలని తెలంగాణ ఆర్థిక మంత్రి ఈటెల రాజేందర్‌ అధికారులను ఆదేశించారు. జగిత్యాలలోని పద్మనాయక్‌ కల్యాణమండపంలో బుధవారం ఆయన వివిధ శాఖల అధికారులతో సమావేశం నిర్వహించారు. ఎస్‌ఆర్‌ఎస్పీ కెనాల్‌ కట్ట తెగిపోయి ఐదు గ్రామాల్లోని చెరువులు నీటితో నిండడమే కాకుండా పంట పొలాలన్నీ నీటిమయమయ్యాయని, లోతట్టు ప్రాంతాలు జలమయమయ్యాయని, అధికారులు స్పందించి ప్రజలను అప్రమత్తం చేయాలని అన్నారు.

రానున్న రెండు రోజుల్లో భారీ వర్ష సూచన మేరకు అధికారులు అప్రమత్తంగా ఉండి ప్రజలను సురక్షిత ప్రాంతాలకు తరలించాలని అన్నారు. నీటితో మునిగిపోయిన పంట పొలాలపై అంచనాలు వేసి త్వరలో రైతులకు నష్టపరిహారం అందించే చర్యలు చేపట్టాలని మంత్రి అన్నారు. చెరువుల లోతట్టు ప్రాంతాల్లోని గ్రామస్థులు అప్రమత్తంగా ఉంచే చర్యలు చేపట్టాలని మంత్రి ఆదేశించారు. ఈ కార్యక్రమంలో కలెక్టర్‌ నీతూకుమారి ప్రసాద్‌, ఎమ్మెల్యే కొప్పుల ఈశ్వర్‌, శోభ, ఆర్డీవో శశాంక్‌, ఎమ్మార్వోలు తదితరులు పాల్గొన్నారు.

వసతులు లేని పాఠశాలల గుర్తింపు
పూర్తయిన జియోగ్రాఫికల్‌ ఇంటిగ్రేటేడ్‌ సర్వే
కరీంనగర్, సెప్టెంబర్ 21 (న్యూస్‌టైమ్): ప్రభుత్వ, ప్రైవేటు పాఠశాలల స్థితిగతులపై ఇటీవల విద్యాశాఖ ప్రారంభించిన జియోగ్రాఫికల్‌ ఇంటిగ్రేటేడ్‌ సర్వే (జీఐఎస్‌)జిల్లావ్యాప్తంగా పూర్తయ్యింది. ప్రభుత్వ, ప్రైవేటు పాఠశాలల్లోని వసతుల వివరాలను వేర్వేరుగా ఆన్‌లైన్‌లో నమోదు చేశారు. గత ఏప్రిల్‌లో ప్రారంభమైన జీఐఎస్‌ సర్వే.. జిల్లాలోని 3102 ప్రభుత్వ, 600 ప్రైవేటు పాఠశాలలో కొనసాగింది. ఆ వివరాలు సేకరించి ప్రత్యేక సాఫ్ట్‌వేర్‌ కలిగిన మోబైల్‌ ద్వారా ఆన్‌లైన్‌లో ఆప్‌లోడ్‌ చేశారు. పాఠశాలలో కనీస వసతులు ఉన్నాయా? లేదా? తెలుసుకునేందుకు విద్యాశాఖ జీఐఎస్‌ సర్వే ద్వారా ఆన్‌లైన్‌లో పొందుపర్చింది. వసతులు లేని కొన్ని ప్రైవేటు పాఠశాలలను విద్యాశాఖ అధికారులు గుర్తించినట్లు సమాచారం. త్వరలో ఆ పాఠశాలలపై చర్యలు తీసుకునేందుకు చర్యలు చేపడుతున్నట్లు తెలిసింది. ప్రభుత్వ పాఠశాలల్లోనూ 30 శాతం వరకు మరుగుదొడ్లు లేవని సర్వేలో వెల్లడైందని సమాచారం. జిల్లాలో కేజీబీ, ఉన్నత పాఠశాలలు 721, ప్రాథమికోన్నత పాఠశాలలు 339, ప్రాథమిక పాఠశాలలు 1995, మోడల్‌ స్కూల్‌లు 47, ప్రైవేటు పాఠశాలలు 600వరకు ఉన్నాయి. జీఐఎస్‌ సర్వే కోసం ప్రత్యేక సాఫ్ట్‌వేర్‌ కలిగిన మోబైల్‌ను విద్యాశాఖ రూపొందించింది. ఆ మోబైల్‌ ద్వారా పాఠశాల భవనం, మంచినీటివసతి, మరుగుదొడ్లు, కరెంట్‌ సౌకర్యం, సైన్స్‌ల్యాబ్, మూత్రశాలలు, ప్రహరీ, క్రీడామైదానం వంటి అంశాలను పరిగణనలోకి తీసుకుని మోబైల్‌ ద్వారా ఫొటోలు తీసి వేర్వేరుగా గూగుల్స్‌కు అనుసంధానం చేశారు. దీని ద్వారా ఏయే పాఠశాలలో ఎలాంటి వసతులు ఉన్నాయో విద్యాశాఖ ఆన్‌లైన్‌లో గుర్తిస్తుంది. అలాగే మానిటరింగ్‌ చేసేటప్పుడు ఈ ఆన్‌లైన్‌తో సులభంగా తనిఖీ చేసే వీలుందని అధికారులు చెబుతున్నారు. ప్రభుత్వ, ప్రైవేటు పాఠశాలలో కనీస వసతులు లేని పాఠశాలలను జీఐఎస్‌ సర్వే ద్వారా అధికారులు గుర్తించారు. కొన్ని ప్రైవేటు పాఠశాలలో ప్రహరీ, మూత్రశాలలు, క్రీడామైదానం లేవని సర్వేలో తేలినట్లు సమాచారం. వేలాది రూపాయలు ఫీజులు వసూలు చేస్తున్నా వసతులు కల్పనలో వెనుకంజ వేయడం విమర్శలు తావిస్తోంది. కొన్ని పాఠశాలలో కనీసం ప్రేయర్‌ చేయడానికీ స్థలం లేదని నిర్ధరణ కావడం యాజమాన్యాల దోపిడీకి నిదర్శనంగా చెప్పుకోవచ్చు. జీఐఎస్‌ ద్వారా సర్వే చేసిన విద్యాశాఖ అధికారులు వసతులు లేని పాఠశాలలపై చర్యలు తీసుకునేందుకు సిద్ధమవుతున్నట్లు సమాచారం.

నీటికాలువలో పడి రెండేళ్ల చిన్నారి మృతి
కరీంనగర్, సెప్టెంబర్ 21 (న్యూస్‌టైమ్): కరీంనగర్ జిల్లా పెగడపల్లి మండలం సుద్దపల్లిలో నీటికాలువలో పడి రెండేళ్ల చిన్నారి మృతి చెందాడు. గ్రామానికి చెందిన తిరుమల(2) ఇంటి ముందు ఆడుకుంటూ వెళ్లి ప్రమాదవశాత్తు నీటికాలువలో పడ్డాడు. తల్లిదండ్రులు గుర్తించకపోవడంతో నీట మునిగి మృతిచెందాడు. గత రెండు రోజులుగా జిల్లా వ్యాప్తంగా భారీ వర్షాలు కురుస్తుండటంతో వాగులు వంకలు పొంగిపొర్లుతున్నాయి. కాగా, విద్యుత్తు చౌర్యం చేస్తూ పట్టుబడిన వ్యక్తిని అరెస్టు చేసినట్లు ఏపీటీఎస్‌ సీఐ బి.శ్రీనివాస్‌ బుధవారం ఇక్కడ తెలిపారు. కాటారం మండలం దామోరకుంట గ్రామానికి చెందిన పత్తిరెడ్డి వెంకటరెడ్డి ఇంటిని విద్యుత్తు అధికారులు 18 జనవరి 2016న తనిఖీ చేయగా మీటర్‌ లేకుండా విద్యుత్తు వాడుకుంటున్నట్లు గుర్తించి కేసు నమోదు చేసి రూ.10,359 జరిమానా విధించారు. మరోమారు 16 ఆగస్టు 2016న రెండవ సారి ఇంటిని తనిఖీ చేయగా విద్యుత్తు చౌర్యం చేస్తున్నట్లు గుర్తించి కేసు నమోదు చేశారు. పత్తిరెడ్డి వెంకటరెడ్డిని అరెస్టు చేసి రిమాండ్‌ కోసం న్యాయస్థానంలో హాజరుపరిచామని తెలిపారు.