కుంభ కోణాల ప్రధానమంత్రి నరేంద్రమోదీ అని సీపీఐ జాతీయ ప్రధాన కార్యదర్శి సురవరం సుధాకర్‌రెడ్డి దుయ్యబట్టారు. ప్రజాస్వామ్య పద్ధతిలో ఎన్నికైన నియంత మోదీ అన్నారు. ఆయన్ను ప్రశ్నిస్తే తమ పదవులు పోతాయని కేంద్రమంత్రులు నోరు మెదపడంలేదని ఆరోపించారు. కేంద్ర ప్రభుత్వ బడ్జెట్‌ ప్రజావ్యతిరేకమైందని, కార్పొరేట్‌ వర్గాలకు లాభం చేకూర్చే విధంగా ఉందని సురవరం ఆక్షేపించారు. అలాగే, మోదీ పెద్దనోట్ల రద్దు వల్ల పేద ప్రజలకు ఒరిగిం దేమీ లేదని, మాజీ ప్రధాని మన్మోహన్‌సింగ్‌ను ఆయన విమర్శించడం కూడా సరికాదన్నారు. చౌకబారు జోకులతో ప్రజలను పక్కదారిపట్టించేలా మోదీ వ్యవహరించారన్నారు. ప్రజాసమస్యలను వినడానికి, వాటిని అర్థం చేసుకోవడానికి ప్రయత్నిస్తేనే బీజేపీకి మనుగడ ఉంటుందన్నారు. అమెరికా అధ్యక్షుడు ట్రంప్‌ విధానాలు సరికావన్నారు. వామపక్ష పార్టీలు విభిన్న సమస్యలపై ఆందోళన కార్యక్రమాలు చేస్తున్నాయన్నారు. కాగా, తమిళనాడులో అన్నాడీఎంకే పార్టీని చీల్చేందుకు బీజేపీ కుట్రపన్నుతోందని సుధాకర్‌రెడ్డి ఆరోపించారు. తమిళనాడులో ప్రజాస్వామ్య విలువలను కేంద్ర ప్రభుత్వం పాటించడం లేదని మండిపడ్డారు. రాష్ట్రపతి పాలన పెట్టాలన్న కుట్ర జరుగుతోందన్నారు. ప్రభుత్వ ఏర్పాటుకు ఎవరికీ అవకాశం కల్పించకపోవడం అన్యాయమని ఆయన అన్నారు. ఏపీ రాజకీయ పరిస్థితులపై స్పందిస్తూ ముఖ్యమంత్రి చంద్రబాబునాయుడు నిర్లక్ష్యం వల్లే ఏపీకి ప్రత్యేకహోదా రాలేదన్నారు. కేంద్ర మంత్రి వెంకయ్యనాయుడు ఏపీ ప్రజలకు క్షమాపణ చెప్పాలని డిమాండ్ చేశారు. ప్రత్యేక హోదా ముగిసిన అధ్యాయమని బాబు అంటున్నారని, ఇదే వైఖరి కొనసాగిస్తే చంద్రబాబుకు ప్రజలు ముగింపు పలుకుతారని సురవరం చెప్పారు.