జివియంసి 20వ వార్డు దండుబజార్‌ వార్డు కార్యాలయం, చేపల మార్కెట్‌ నిర్మాణాలను సత్వరం పూర్తిచేయాలని కమీషనర్‌ హరినారాయణన్‌ పేర్కొన్నారు. క్షేత్రపర్యటనలో భాగంగా 26వ వార్డు పాతబస్టాండ్‌ రహదారులను శుభ్రం చేయాలని, పనికి రాని వాహనాలను నిర్దేశించిన ప్రాంతానికి తరలించాలని ఆదేశించారు. తదుపరి వేలంపేట పోస్టాఫీసు రోడ్‌, రెల్లివీధి అంబేద్కర్‌ జంక్షన్‌లలో పారిశుధ్యం మెరుగు పరచాలని పేర్కొన్నారు. పనికి రాని బడ్డీలను వేరొక చోటకు తరలించాలని, పశువులను రోడ్లకు అడ్డంగా ఉంచకుండా చూడాలని ఆదేశించారు.

అదేవిధంగా అన్ని మరుగుదొడ్లను సక్రమంగా నిర్వహించాలని సూచించారు. స్వచ్ఛభారత్‌, స్వచ్ఛసర్వేక్షన్‌లో పరిశుభ్రమైన మరుగుదొడ్లు, గోడలకు పెయింటింగ్‌, లైటింగ్‌, రన్నింగ్‌ వాటర్‌తో వినియోగించుకొనే విధంగా నిర్వహించాలని సూచించారు. కలెక్టరేట్‌జంక్షన్‌లోని మరుగుదొడ్లు పై ప్రత్యేకశ్రద్ధ వహించాలని, కూడలిలో ఏర్పాటు చేసిన హోర్డింగ్‌ను తొలగించాలని ఆదేశించారు. మరుగుదొడ్లకు, నగరంలోని గోడలకు అతికించిన పోస్టర్‌ లను తొలగించి పోస్టర్‌ రహిత నగరంగా రూపొందించాలని, గోడలకు పోస్టర్లు అతికించడంపై నిషేధం ఉన్నట్లు వివరించారు. పర్యటనలో మూడవ జూనల్‌ కమీషనర్‌, వి.చక్రధరరావు, ఇ.ఇ.మహేష్‌, ఏ.యం.ఓ.హెచ్‌ డా|| మురళీమోహన్‌, ఏసిపి సత్యనారాయణ జోనల్‌ సిబ్బంది పాల్గొన్నారు.