దక్షిణ భారత దేశంలోనే ప్రముఖ దేవాలయం, రాష్ట్రంలో అతిపెద్ద ఆలయంగా ఉన్న శ్రీ దుర్గామల్లేశ్వర కనకదుర్గమ్మ అమ్మవారి ఆలయానికి భద్రత కొరవడింది. రాష్ట్ర విభజనతో రాష్ట్రంలోనే (తిరుపతి స్వయం ప్రతిపత్తి ఆలయం) దుర్గగుడి అతి పెద్ద ఆలయంగా అవతరించింది. దేవాదాయ, ధర్మాదాయశాఖ ఆధీనంలో ఉన్న విజయవాడ ఇంద్రకీలాద్రిపై ఉన్న దుర్గమ్మ గుడి విషయంలో ప్రభుత్వం సాచివేత ధోరణితో వ్యవహరి స్తోందనే విమర్శలు వ్యక్తమవుతున్నాయి. ఏటా రూ.50 కోట్లపైనే ఆదాయం ఉన్న దుర్గమ్మకు భద్రత కల్పించాలంటే ఆలయంపై అదనపు భారం పడుతోందని అధికారులు పేర్కొనటం, భద్రతకు ప్రభుత్వం ఎంత విలువనిస్తుందో అర్థం చేసుకోవచ్చు.

వాస్తవానికి దుర్గమ్మ ఆలయానికి స్వయం ప్రతిపత్తి కల్పించాల్సిన అవసరం ఎంతైనా ఉంది. తిరుమల తిరుపతి దేవస్థానముల తరహాలోనే కనకదుర్గమ్మ ఆలయాలను కూడా గ్రూపు ఆలయాలుగా మార్చాలనే ప్రతిపాదన ఎప్పటి నుంచో ఉంది. తిరుపతి, శ్రీశైలం వంటి ఆలయాలకు స్పెషల్‌ ప్రొటెక్షన్‌ ఫోర్స్‌ (ఎస్‌పీఎఫ్‌) బలగాలతో భద్రత కల్పిస్తున్నారు. ఆ దేవాలయాల కోవకే చెందిన కనకదుర్గమ్మ ఆలయం విషయంలో మాత్రం ప్రభుత్వం మిన్నకుండటంపై పలు విమర్శలు వ్యక్తమవుతున్నాయి.

రాష్ట్ర విభజనతో ఉగ్రవాదుల దృష్టి అన్ని రాష్ట్రాల రాజధానులలోని ప్రముఖ దేవాల యాలపై పడింది. శ్రీశైలం, తిరుపతి, ఇంద్రకీలాద్రిపై ఉన్న దుర్గమ్మ ఆలయంతోపాటు బ్యారేజీకి కూడా ముప్పు పొంచి ఉన్నట్లు ఇంటెలిజెన్స్‌ బ్యూరో (ఐబీ) హెచ్చరికలు జారీ చేసింది. కాని దుర్గమ్మ ఆలయ భద్రతను పెంచే విషయంపై ప్రభుత్వంగానీ, దేవాదా యశాఖగానీ ఎలాంటి ఆలోచన చేయటంలేదు. ఇంద్రకీలాద్రిపై ఉన్న కనకదుర్గమ్మ అమ్మవారికి ప్రస్తుతం 18 మందితో భద్రత కల్పిస్తున్నారు. వారిలో 16 మంది కానిస్టేబుళ్లు, మరో ఇద్దరు హెడ్‌ కానిస్టేబుళ్లు.

వీరికితోడు 20 మంది హోంగార్డులు, మరో 133 మంది ప్రైవేటు సెక్యూరిటీ సిబ్బంది ఉన్నారు. ఇంద్రకీలాద్రి దిగువ నుంచి కొండపై వరకు కీలక కేంద్రాలలో మూడు షిఫ్టులలో ఇద్దరేసి భద్రతా సిబ్బంది ఉండాలి. కొండ దిగువన టోల్‌గేట్‌, ఓం మలుపు, చెప్పుల స్టాండ్‌, స్టోర్‌ రూమ్‌, అంతరాలయం, క్యూలైన్లు, మల్లికార్జునస్వామి ఆలయం, శివాలయం ప్రాంతాలలో మూడు షిఫ్టులలో భద్రతా వలయం ఉండాలి. కాని ఎక్కడా భద్రతా కనిపించటంలేదు. దుర్గగుడిలో అన్యమత ప్రచారం కూడా జరుగుతోంది.

కొండపై ఉన్న వాటర్‌ ట్యాంక్‌లో గతంలో ఒక మృతదేహం లభించింది. ఆ నీటినే భక్తులకు సరఫరా చేయటంతో పాటు అమ్మవారి సంప్రోక్షణకు ఉపయోగిస్తున్నారు. అంటే ఇక్కడే కొండపై భద్రత ఎంత పటిష్టంగా ఉందో అర్థమవుతోంది. దుర్గగుడి భద్రతను రెట్టింపు చేయాలని మూడేళ్ల క్రితమే ప్రతిపాదనలు ప్రభుత్వానికి వెళ్లారు. గతంలో ఒక ఇన్‌స్పెక్టర్‌ ఆధ్వర్యంలో 40 మంది కానిస్టేబుళ్లు, నలుగురు హెడ్‌ కానిస్టేబుళ్లను నియమించాలని ప్రతిపాదనలు రూపొందించారు.

అయితే భద్రతా సిబ్బందికి దుర్గగుడి నిధుల నుంచే జీతాలు ఇవ్వాలనే నిబంధన ఉండటంతో ప్రభుత్వం ఆ ప్రతిపాదనలను పక్కన పెట్టింది. రాష్ట్ర విభజనతో దుర్గగుడి ప్రాధాన్యత పెరిగింది. కమాండెంట్‌ లేదా అదనపు కమాండెంట్‌స్థాయి అధికారి పర్యవేక్షణలో ఒక ఇన్‌స్పెక్టర్‌, ఇద్దరు ముగ్గురు ఎస్‌ఐలు, 60 మంది కానిస్టేబుళ్లు, హెడ్‌ కానిస్టేబుళ్ల అవసరం ఉంటుందని ఆలయ అధికారులే అంచనా వేస్తున్నారు. కాని ఇందుకు సంబంధించిన ప్రతిపాదనల రూపల కల్పనపై ఎవరికీ దృష్టి లేకపోవటం గమనార్హం. తరచూ విజయవాడకు వస్తున్న ముఖ్యమంత్రి చంద్రబాబునాయుడుసైతం దుర్గగుడి భద్రత విషయంపై దృష్టి సారించకపోవటం శోచనీయం.