న్యూఢిల్లీ: పెద్దనోట్ల రద్దు తర్వాత ఏర్పడిన నగదు ఉపసంహరణ సమస్యలకు క్రమంగా కేంద్రం పరిష్కారం చూపుతూ వస్తోంది. ఈ నేపథ్యంలో ఇప్పటి వరకూ ఉన్న నగదు ఉపసంహరణ పరిమితిని మరింత పెంచింది. ప్రస్తుతం ఉన్న 4500 రూపాయల పరిమితిని ఏకంగా 10 వేల రూపాయలకు పెంచుతూ నిర్ణయం తీసుకుంది నరేంద్రమోదీ సర్కారు. ఈ మేరకు సోమవారం భారతీయ రిజర్వు బ్యాంకుకు తగు ఆదేశాలతో కూడిన ఉత్తర్వులను జారీచేసింది కేంద్ర ఆర్ధిక మంత్రిత్వ శాఖ.

ఏటీఎంలలో ప్రస్తుతం ఒక రోజుకు ఉన్న ఉన్న నగదు ఉపసంహరణ పరిమితి రూ.4,500 నుంచి రూ10 వేలకు పెంచారు. అయితే వారానికి ఉన్న రూ.24,000 పరిమితిని మాత్రం అలాగే ఉంచారు. కరెంటు ఖాతా నుంచి నగదు ఉపసంహరణ పరిమితి వారానికి రూ.50 వేల నుంచి రూ.లక్షకు పెంచారు. గత ఏడాది నవంబర్‌ 8న పెద్దనోట్లను రద్దు చేస్తూ కేంద్ర ప్రభుత్వం నిర్ణయం తీసుకున్న నేపథ్యంలో ఏటీఎంల నుంచి నగదు ఉపసంహరణపై పరిమితి పెట్టిన విషయం తెలిసిందే.

మొదట రూ.2000గా ఉన్న ఈ పరిమితిని ఇటీవలే రూ.4,500కు పెంచారు. ప్రస్తుతం ఆ పరిమితిని రూ.10 వేలకు పెంచుతూ ఆర్‌బీఐ ఉత్తర్వులు జారీ చేసింది. ఇదిలావుండగా, పెద్ద మొత్తాల జమపై ఐటీ శాఖ నిఘా నిరంతరం కొనసాగుతూనే ఉంది. గత వారం కో ఆపరేటివ్ బ్యాంకులు సహా ఇతర బ్యాంకులు, పోస్ట్ ఆఫీసులు నుంచి వివరాలు కోరింది ఐటీ శాఖ. ఏప్రిల్ 1 నుంచి నవంబర్ 9 వరకు నగదు డిపాజిట్ వివరాలను సమర్పించాలని ఐటీ శాఖ ఆదేశాలు జారీచేసింది. ఫిబ్రవరి  28, 2017 లోపు  నివేదిక సమర్పించాలని ఆదేశిచింది.

మరోవైపు, పెద్ద నోట్ల డిపాజిట్లలో ఎన్‌ఆర్ఐలకు ఆర్థికశాఖ కొత్త మెలిక పెట్టింది. విదేశాలకు వెళ్ళే భారతీయులు అయితే మార్చి 31 వరకు వరకు, ఎన్ఆర్ఐలకు జూన్ 30 వరకు ఆర్‌బిఐ శాఖల్లో డబ్బును డిపాజిట్  చేసుకోవచ్చని సూచించింది. డిపాజిట్ కంటే ముందు కస్టమ్స్ అధికారుల నుండి ధృవీకరణ పత్రాలను తీసుకురావాలని ఆర్థికశాఖ స్పష్టంచేసింది. రద్దుచేసిన నగదు నోట్లను మార్చుకొనేందుకు ఎన్ఆర్ఐలకు  2017, జూన్ 30 వరకు కేంద్రం అవకాశం ఇచ్చిన విషయం తెలిసిందే. ఫెమా చట్ట నిబంధనల కింద ఒక్కొక్కరు రూ.25 వేలకు పరిమితి విధించింది.