ప్రతిపాదిత ఔషధనగరి వారి జీవితాల్లో చీకట్లు నింపుతోంది. సర్కారు భూదందా కారణంగా ఒకటి కాదు రెండు కాదు ఏకంగా వెయ్యి కోట్ల వరకూ రైతులు నష్టపోయారు. ప్రతిపాదిత ఫార్మా సిటీ కోసం ప్రభుత్వం కౌరు చౌకగా రైతులను పంట పొలాలను కొల్లగొట్టింది. అటు ఉపాధి లేక ఇటు సర్కారు ఇచ్చిన నష్ట పరిహరం ఏ మూలకూ చాలక రైతులు రెంటికీ చెడ్డారు. అందుకే 2013 భూ సేకరణ చట్టం ప్రకారమే తమకు పరిహారం చెల్లించాలని, న్యాయంగా తమకు అందాల్సిన మొత్తాన్ని ఇచ్చి తీరాలని డిమాండ్‌ చేస్తున్నారు.

విన్నారుగా ముచ్చర్ల రైతుల గోస. పచ్చటి పంట పొలాల్లో నిప్పులు పోసినట్లు ప్రభుత్వం వీరి జీవితాల్లో చిచ్చు పెట్టింది. తమ నోటికాడి కూడు లాక్కొంటోందని రైతులు ఎంతలా మొత్తుకున్నా ప్రభుత్వం మాత్రం పెడచెవిన పెట్టింది. ఒకటి కాదు రెండు కాదు వందల ఎకరాలు రైతుల నుంచి లాక్కొంది. రైతులు వద్దని వారించినా బలవంతంగా వారినుండి భూములను లాగేసుకుంది. రైతులకు ఏదో మొక్కుబడి పరిహారం చెల్లించి పచ్చటి భూములను లాక్కొంది. ఫలితం రైతులు సుమారు వెయ్యి కోట్ల రూపాయల దాకా నష్టపోయారు.

ముచ్చర్ల ఫార్మా సిటీ రాజధాని హైదరాబాద్‌ శివార్లలో అంతర్జాతీయ ప్రమాణాలతో రూపుదిద్దుకోనుంది. నాగార్జున సాగర్, శ్రీశైలం జాతీయ రహదారుల మధ్య ప్రాంతంలో ఫార్మా సిటీ నిర్మాణానికి భూ సేకరణను సైతం చేపట్టింది ప్రభుత్వం. రంగారెడ్డి జిల్లా కందుకూరు, యాచారం, మహబూబ్‌నగర్ జిల్లా అమనగల్లు మండలంలో 12 వేల ఎకరాల్లో భూములను ఫార్మా సిటీ కోసం సేకరిస్తోంది. ఇప్పటి వరకు కందుకూరు మండలం ముచ్చర్ల, మీర్ఖాన్ పేట్, సాయిరెడ్డి గూడ, పంజాగూడ గ్రామాల్లో, యాచారం మండలం కురుమద్దిలో 3వేల ఎకరాలకు పైగా సేకరించింది. జీవో 123 కింద నష్ట పరిహరం చెల్లించి భూములను టీఎస్ ఐఐసీ స్వాధీనం చేసుకొని సొంతంగా కంచె కూడా వేసింది సర్కారు.

12 వేల ఎకరాల భూమిని సేకరించిన తర్వాత ప్రైవేట్ ఫార్మా కంపెనీలకు ఆయా భూములను అప్పజెప్పనుంది ప్రభుత్వం. అయితే మల్లన్న సాగర్ నిర్వాసితులు జీవో 123ని కాదని, 2013 భూ సేకరణ చట్ట ప్రకారమే తమకు నష్ట పరిహరం చెల్లించాలని ఉద్యమిస్తున్న నేపథ్యంలో ముచ్చర్ల ఫార్మా సిటీ పరిసర గ్రామాల్లో ఆందోళనలు వ్యక్తమవుతున్నాయి. జీవో 123 భూ నిర్వాసితులకు ఎంత మేర నష్టపరిహరం చెల్లించిదో మీడియా కూడా పరిశీలించింది. అక్కడి రైతాంగానికి జీవో 123 ప్రకారం అధిక నష్ట పరిహరం అందిందా? లేక భూ సేకరణ చట్టం అమలు చేస్తే ఇంకా ఎక్కువ నష్ట పరిహరం అందేదా? అన్న అంశాలపై భూ నిర్వాసితుల అభిప్రాయాలను సేకరించింది.

ఈ ప్రక్రియలో రైతుల ఆవేదనను తెలుసుకునే ప్రయత్నం చేసినా ఎలాంటి ప్రయోజనం లేకుండాపోయింది. అయితే జీవో 123 వల్ల తాము తీవ్రంగా నష్టపోతున్నామని రైతులు ఆవేదన వ్యక్తం చేస్తున్నారు. నిర్వాసితుల ఉపాధి అంశాన్ని విస్మరించిన జీవో నష్ట పరిహరం విషయంలోనూ తమకు అన్యాయం చేసిందని విలపిస్తున్నారు. భూ సేకరణ చట్టం అమలు చేయకపోవడం వల్ల తాము వందల కోట్ల మేర నష్టపోయామని రైతులు నెత్తి నోరు బాదుకుంటున్నారు. ప్రభుత్వం ఇప్పటికైనా తమకు 2013 భూ సేకరణ చట్టం ప్రకారం పరిహారం చెల్లించాలని లేదంటే మల్లన్నసాగర్‌ నిర్వాసితుల తరహాలో ఉద్యమిస్తామని హెచ్చరిస్తున్నారు ముచ్చెర్ల రైతులు. అసలింతకీ 2013 భూ సేకరణ చట్టం ఏం చెప్తోంది.

ఈ చట్టం అమలు చేస్తే ముచ్చర్ల రైతులకు చేకూరే లబ్ది ఏంటి? ఇంతకీ ముచ్చర్లలో ఎకరం భూమి విలువ ఎంత ఉంది? ప్రభుత్వం రైతులకు ఇచ్చిన నష్టపరిహారం ఎంత? ముచ్చర్ల  రైతులను ప్రభుత్వం దగా చేసిందా లేదా? అన్న ప్రశ్నలకు ఇక్కడ సమాధానమే దొరకదు. కందుకూరు, మహేశ్వరం సబ్ రిజిస్ట్రార్ రికార్డుల ప్రకారం ముచ్చర్ల గ్రామంలో ఎకరం విలువ ఏడున్నర లక్షలుగా  2015లోనే నిర్ణయించారు. దానికనుగుణంగా జీవో 123 ప్రకారం రైతు పట్టా భూములకు ఎకరాకు పన్నెండున్నర లక్షలు, అసైన్‌మెంట్‌ భూమికి 8 లక్షల నష్ట పరిహరం చెల్లించారు.

జీవో 123 అమలు చేస్తున్నందునే రిజిస్ట్రేషన్ విలువ కన్నా 5 లక్షలు అధికంగా నష్ట పరిహరం చెల్లించామని ప్రభుత్వం గొప్పలు చెప్పుకుంది. జీవో ప్రకారం ఇచ్చిన పరిహారం చాలా తక్కువేనన్నది స్పష్టం. అసలు 2013 భూ సేకరణ చట్టం ప్రకారం రైతులకు ఎంత నష్ట పరిహరం వచ్చేదో ఓసారి పరిశీలిద్దాం. 2013 భూ సేకరణ చట్టంలోని సెక్షన్ 26 ప్రకారం రిజిస్ట్రేషన్‌ విలువకు కనీసం మూడు రెట్లకి తగ్గకుండా నష్ట పరిహరం చెల్లించాలి. అంటే ఎకరాకు రిజిస్ట్రేషన్ విలువ ఏడున్నర లక్షలున్న ముచ్చర్లలో రైతుకు కనీసం ఇరవై రెండున్నర లక్షల నష్ట పరిహరం అందాలి.

అంటే ప్రతి ఎకరానికి రైతులు సుమారు పద్నాలుగున్నర లక్షలు నష్టపోయారన్న మాట. ఈ ఒక్క ముచ్చర్ల గ్రామంలోనే ప్రభుత్వం 862 ఎకరాలను సేకరించింది. అంటే ఇక్కడి రైతులే దాదాపు 125 కోట్ల రూపాయలను నష్టపోయారు. భూ సేకరణ చట్టం గురించి తమకు తెలియకపోవడంతో సర్కారు తమను నిండా ముంచేసిందని రైతులు లబోదిబోమంటున్నారు. ఇక మరో గ్రామం మీర్ఖాన్ పేటను తీసుకుందాం. ఇక్కడ ఎకరాకు 6 లక్షల 5 వేలు రిజిస్ట్రేషన్ విలువ ఉంది. ఇక్కడ 611 ఎకరాల భూమిని ఎకరం ఏడు లక్షల 70 వేల రూపాయల చొప్పున సేకరించింది ప్రభుత్వం. అదే భూ సేకరణ చట్ట ప్రకారమైతే ఎకరాకు 18 లక్షలకు పైగా నష్ట పరిహారం దక్కేది.

అంటే మీర్ఖాన్ పేట్ రైతులు ఎకరాకు సగటున 10 లక్షలు నష్ట పోయారు. దీని వల్ల తమ ఒక్క గ్రామమే 60 కోట్ల వరకు నష్టపోయింది. ఇదే రీతిలో పంజాగూడ గ్రామంలోనూన ప్రతి ఎకరాకు 10లక్షల చొప్పున రైతులు నష్టపోయారు. అక్కడ 515 ఎకరాల భూ సేకరణ జరిగినందున 51 కోట్ల మేర నష్టపోయారు రైతులు. భూసేకరణ చట్టం ప్రకారమైతే ఎకరాకు రూ.18లక్షలు అంటే ముచ్చర్ల, మీర్ఖాన్ పేట్, పంజాగూడ గ్రామాల్లోనే రైతులు జీవో 123 వల్ల సుమారు 250 కోట్ల రూపాయల వరకు నష్టపోయారు. ఇక మిగిలిన అన్ని గ్రామాలను కలుపుకుంటే అది వేయికోట్ల వరకు ఉండొచ్చనేది రైతు సంఘాలు అంచనా వేస్తున్నాయి. ఇక అసైన్డ్, నాన్ అసైన్డ్ అన్న తేడాలను తొలగిస్తే అది మరింత పెరుగుతుందంటున్నారు.

అదే సందర్భంలో కేవలం నగదు రూపంలోనే కాకుండా..జీవో 123 వల్ల ఎన్నో రకాలుగా నష్ట పోతున్నారు ఇక్కడి ప్రజలు. భూ సేకరణ వల్ల ఉపాధి కోల్పోయిన కుంటుంబాలకు నెలకు 2వేల చొప్పున 20 సంవత్సరాలు లేదా ఒకేసారి 5లక్షల ఉపాధి పరిహరం చెల్లించాలని భూ సేకరణ చట్టం సెక్షన్ 31, 38, 105 షెడ్యుల్ 2 స్పష్టం చేస్తోంది. కానీ జీవో 123లో అలాంటి నిబంధనలు లేకపోవడంతో వారిని పట్టించుకోవడం లేదు ప్రభుత్వం. ఫార్మాసిటీ నిర్మాణం పూర్తయితే కనీసం 70 వేల మందికి ఉద్యోగాలిస్తామని ఆశలు కల్పిస్తుంది తప్ప ప్రస్తుతం జీవనోపాధి చూపించడంలేదు.

ఈ మూడు గ్రామాల్లో చేసిన భూ సేకరణ వల్ల 2వేల కుటుంబాలు రోడ్డునపడ్డాయి. అదే భూ సేకరణ చట్టం అమలు చేస్తే భూమికి భూమి పరిహారంగా దక్కేదని, ఉపాధి కూడా లభించేదంటున్నారు ఇక్కడి ప్రజలు. అందుకే  రైతులకు వేలకోట్ల రూపాయల నష్టం చేస్తున్న 123 జీవోను రద్దు చేసి 2013 భూ సేకరణ చట్టాన్ని అమలు చేయాలని ముచ్చర్ల ఫార్మా నిర్వాసితులు డిమాండ్ చేస్తున్నారు. అప్పటి దాకా బలవంతపు భూ సేకరణ ఆపాలని కోరుతున్నారు.