పోలవరం ప్రాజెక్టు నిర్మాణం కోసమే ప్రత్యేక ప్యాకేజీకి తాను అంగీకరించినట్లు ముఖ్యమంత్రి నారా చంద్రబాబునాయుడు తెలిపారు. మంగళవారం ఇక్కడ జరిగిన తెదేపా ప్రతినిధుల వర్క్‌షాప్‌లో ఆయన పాల్గొని మాట్లాడారు. రాష్ట్రంలో కరవును పారదోలాలన్న, తాగునీటి ఎద్దడి తేర్చాలన్న పోలవరం ప్రాజెక్టు శరణ్యమని అన్నారు. దీనిని సొంత నిధులతో పూర్తిచేసే స్థితి ప్రభుత్వానికి లేదని అన్నారు. ప్రత్యేక ప్యాకేజీని అంగీకరిస్తే కేంద్రమే ఈ ప్రాజెక్టును నిర్మిస్తుందని, దీనితో రాష్ట్రం సస్యశ్యామలమవుతుందని ముఖ్యమంత్రి తెలిపారు.

దీనిని దృష్టిలో పెట్టుకొని తాను ప్రత్యేక ప్యాకేజీకి అంగీకరిస్తే కొందరు అవాకులు చెవాకులు పేలుతున్నారని అన్నారు. వారికి రాష్ట్ర అభివృద్ధి పట్టదని అన్నారు. ప్రత్యేక ప్యాకేజీని ఏ పరిస్థితుల్లో అంగీకరించామో నాయకులు, కార్యకర్తలు ప్రజల్లోకి తీసుకువెళ్లాలన్నారు. కార్యకర్తలు చిత్తశుద్ధితో పనిచేయాలన్నారు. అప్పుడే వారికి గుర్తింపు వస్తుందన్నారు. పసుపు చొక్క ధరించినందుకు తనకు ప్రపంచస్థాయి గుర్తింపు వచ్చిందన్నారు. వివిధ పార్టీల నాయకులు కూడా తనలాగా ఆలోచించి ప్రజలకు సేవ చేయాలని అన్నారు.

పార్టీ కార్యక్రమాల్లో పాల్గొన్న వారికి రానున్న ఎన్నికల్లో టికెట్‌ వస్తుందని అన్నారు. ప్రజావ్యతిరేకత తెలిపిన వారిని పక్కనపెట్టడానికి తాను ఏమాత్రం ఆలోచించబోనని అన్నారు. జనవరి 1 నుంచి జరిగే జన్మభూమి కార్యక్రమంలో నేతలు, కార్యకర్తలు చురుకుగా పాల్గొనాలని అన్నారు. ఈ కార్యక్రమంలో పార్టీ రాష్ట్ర శాఖ అధ్యక్షుడు కళా వెంకటరావు, పార్టీ జాతీయ ప్రధాన కార్యదర్శి నారా లోకేష్‌తో పాటు ఎంపిలు, ఎమ్మెల్యేలు, సీనియర్‌ నాయకులు పాల్గొన్నారు.