ఏలూరు: గన్‌ లైసెన్స్‌ హక్కు కాదని జిల్లా మెజిస్ట్రేట్‌గా సంతృప్తి చెందితేనే తుపాకీ లైసెన్స్‌ ఇస్తానని అంతేతప్ప అది ఒక హక్కుగా ఎవరూ భావించాల్సిన అవసరం లేదని పశ్యిమ గోదావరి జిల్లా కలెక్టరు డాక్టర్ కాటమనేని భాస్కర్‌ చెప్పారు. స్థానిక కలెక్టర్‌ కార్యాలయంలో సోమవారం నిర్వహించిన మీకోసం కార్యక్రమంలో జిల్లా నలుమూలలనుండి వచ్చిన ప్రజలనుండి కలెక్టర్‌ ఫిర్యాదులు, వినతులు స్వీకరించి వాటి సత్వర పరిష్కారానికి సంబంధిత అధికారులకు ఆదేశాలు జారీచేశారు.

ఈ సందర్భంగా ఆయన మాట్లాడుతూ చాగల్లుకు చెందిన బియస్‌యఫ్‌ హెడ్‌ కానిస్టేబుల్‌గా పనిచేసిన పిల్లి ప్రభాకర్‌ గన్‌ లైసెన్స్‌ రెన్యువల్‌ చేయాలని కోరగా కలెక్టరు స్పందిస్తూ తుపాకీ లైసెన్స్‌ ఎవరికిపడితే వారికి ఇష్టానుసారం ఇచ్చేదికాదని ఆయుధ లైసెన్స్‌ ఎవరూ కూడా ఒక హక్కుగా భావించకూడదని అవసరమని భావిస్తేనే తుపాకీ లైసెన్స్‌ ఇవ్వడం గానీ రెన్యువల్‌ చేయడంగానీ జరుగుతుందే తప్ప ఖచ్చితంగా గన్‌ లైసెన్స్‌ ఇచ్చి తీరాలని డిమాండ్‌ చేసే హక్కు లేదని కలెక్టరు స్పష్టం చేసారు.

తాను గన్‌ లైసెన్స్‌ ఇవ్వకపోతే కోర్టుకు వెళ్లాలే తప్ప మరొక మార్గం లేదని ఒకసారి గన్‌ లైసెన్స్‌ విషయంలో నిర్ణయంతీసుకున్నాక దానికి తాను కట్టుబడి ఉంటానని భాస్కర్‌ స్పష్టం చేసారు. వృద్దాప్యంలో తల్లిదండ్రుల ఆలనాపాలనా చూడకుండా భౌతికదాఢులకు సైతం పాల్పడే పిల్లలపై చట్టప్రకారం తీసుకోవడం జరుగుతుందని భాస్కర్‌ చెప్పారు. కొంతమంది పిల్లలు గారాభంగా పెంచిన తల్లిదండ్రులను వృద్దాప్యంలో నిర్లక్ష్యం వహిస్తున్నారని, ఆస్తులను వ్రాయించుకుని వారి ఆలనాపాలనా చూడకుండా మానవత్వం మరిచి భౌతిక దాఢులకుసైతం పాల్పడటం చాలా బాధాకరమైన విషయమని ఆవేదన వ్యక్తంచేశారు.

తల్లిదండ్రుల బాగోగులు చూసుకోవాల్సిన బాధ్యత వారిపైవుందని, తల్లిదండ్రులకు సేవచేయడం అదృష్టంగా భావించాలన్నారు. పిల్లలకు చిన్నదెబ్బతలిగితే విలవిలలాడుతూ ఎంతో గారాభంగా పెంచుతారని, అలాంటి తల్లిదండ్రులను వృద్ధాప్యంలో నిర్లక్ష్యం వహించడం ఎంతవరకూ న్యాయమో ప్రతివారు ఆలోచించుకోవాలని హితవు పలికారు.

ఉంగుటూరు మండలం వెలంపేటకు చెందిన యస్‌. భాస్కరరావు అనే వృద్ధుడు సరిగ్గా నడవలేని పరిస్ధితుల్లో వచ్చి కలెక్టరుకు వినతిపత్రం సమర్పిస్తూ తన కుమారుడు యస్‌కెయస్‌ నారాయణ తాడేపల్లిగూడెం ఆర్‌టిసి డిపోలో పనిచేస్తున్నారని తనకున్న ఆస్ధిని తనపేరుమీద రాయించుకుని తనను సరిగ్గా చూడడం లేదని, భౌతిక దాడులకు కూడా పాల్పడుతున్నారని ఫిర్యాదు చేసారు.

దీనిపై కలెక్టరు స్పందిస్తూ అవసరమైన చర్యలు తీసుకోవాల్సిందిగా దివ్యాంగుల శాఖ అధికారులను కలెక్టరు ఆదేశించగా వృద్ధుడు స్పందిస్తూ తన కుమారుడుపై చర్యలు వద్దని, తనను సక్రమంగా చూసుకునేలా కౌన్సిలింగ్‌ చేయాలని చెప్పడంపై పిల్లలు ఎటువంటివారైనా వారిపై తల్లిదండ్రులకు ఎంత ప్రేమ మమకారం ఉంటుందో ఈసంఘటనే ఉదాహరణని కలెక్టరు చెప్పారు.

పెదవేగి మండలం దుగ్గిరాల గ్రామానికి చెందిన పోకాటి పున్నయ్య అనే వ్యక్తి కలెక్టరుకు ఫిర్యాదు చేస్తూ తన ఇంటి వాడకం నీరును వెళ్లనీయకుండా పక్కనే నివాసముంటున్న కిషోర్‌ అనే వ్యక్తి అడ్డుకోవడం వలన మురుగునీరు పోయే మార్గం లేక సంవత్సర కాలంగా తాను ఎన్నో ఇబ్బందులు పడుతున్నానని సదరు వ్యక్తి ప్రభుత్వ స్ధలాన్ని ఆక్రమించుకుని ఇల్లు నిర్మించుకున్నారని, ఈ విషయమై పంచాయతీ సర్పంచ్‌కు ఎన్నిసార్లు ఫిర్యాదు చేసినా పట్టించుకోవడం లేదని చెప్పారు.

దీనిపై కలెక్టరు స్పందిస్తూ ప్రతీ ఒక్కరూ పొరుగువారితో సత్సంబంధాలు, స్నేహపూర్వకంగా మెలగాలని ఇటువంటి చిన్న చిన్న సమస్యలను కూర్చుని మాట్లాడుకుంటే పరిష్కారం అవుతాయన్నారు. పంతాలకు పట్టింపులకు పోకుండా ఇరుపక్షాలు ఆరోగ్యకరమైన వాతావరణంలో మాట్లాడుకుంటే ఎటువంటి సమస్యనైనా ఎవరికివారే పరిష్కరించుకోవచ్చునన్నారు.

ఈ విషయమై స్వయంగా పరిశీలించి పరిష్కరించవలసిందిగా జిల్లా పంచాయతీ అధికారి కె. సుధాకర్‌ను కలెక్టరు ఆదేశించారు. ఏలూరు తంగెళ్లమూడి పంచాయతీ బిడికాలనీలో తన ఇంటికి దారిలేక ఆక్రమణదారులను కొందరు ప్రోత్సహిస్తున్నారని తనదారికి అడ్డంగా ఉన్న అక్రమ ఫెన్సింగ్‌ నిర్మాణం, కట్టడాలను తొలగించాలని శ్రీనివాసరెడ్డి కలెక్టరుకు వినతిపత్రం సమర్పించగా దీనిపై విచారించి తగు నిర్ణయం తీసుకోవాలని జిల్లా పంచాయతీ అధికారిని కలెక్టరు ఆదేశించారు.

ఏలూరు గొల్లాయిగూడెం గ్రామానికి చెందిన కర్రి సైదులు అనే వృద్ధురాలికి ఆధార్‌ కార్డులో 50 సంవత్సరాలు వయస్సు ఉన్నప్పటికీ వాస్తవంగా ఆమెకు 70 ఏళ్లు పైబడి ఉంటాయని ఇటువంటి అర్హతగల వృద్ధుల విషయంలో తక్షణమే పెన్షన్‌కు సిఫార్స్‌ చేస్తూ కలెక్టరు డియస్‌ఓకు తగు ఆదేశాలు జారీ చేసారు. ఈ మీ-కోసం కార్యక్రమంలో ఈరోజు తక్కువుసంఖ్యలో ఫిర్యాదులు, వినతులు అందాయి. పెన్షన్లు, నివాసగృహాలు కావాలని పలు వినతులు రాగా వాటిని పరిష్కరించవలసిందిగా సంబంధితాధికారులను కలెక్టరు ఆదేశించారు.

ఈ కార్యక్రమంలో జేసీ పులిపాటి కోటేశ్వరరావు, అడిషినల్‌ జేసీ షరీఫ్‌, డిఆర్‌ఓ కట్టా హైమావతి, హౌసింగ్‌ పిడి శ్రీనివాసరావు, వ్యవసాయ శాఖ జేడీ సాయిలక్ష్మీశ్వరి, డిఆర్‌డిఏ పిడి కె. శ్రీనివాసులు, దివ్యాంగుల శాఖ సహాయ సంచాలకులు ప్రసాదరావు, ఉద్యానవన శాఖ డిడి ప్రసాద్‌, ఏడిలు దుర్గేష్‌, విజయలక్ష్మి, ఆర్‌డబ్ల్యుయస్‌ యస్‌ఇ అమరేశ్వరరావు, యల్‌డియం సుబ్రహ్మణ్యేశ్వరరావు, డియంహెచ్‌ఒ డాక్టర్ కోటేశ్వరి, డిసిహెచ్‌యస్‌ డాక్టర్ శంకరరావు, యస్‌ఇ కార్పోరేషన్‌ ఇడి ఝాన్సీరాణి, ఇతర శాఖల అధికారులు, తదితరులు పాల్గొన్నారు.