ప్రేమికుల రోజు అంటే… యువతకు పండగే. ఆరోజు అందమైన గులాబీలతో తమ ప్రేమను పరస్పరం వ్యక్తీకరించుకొంటుంటారు. పువ్వుల్లోని పరిమళం, మకరందం జీవితంలోనూ ఉండాలని, మది నిండా ఆ పరిమళాలను ఆస్వాదిస్తూ అనుభూతించాలనుకునే రోజు. అదే వాలెంటైన్స్‌ డే. యువత జీవితాన్ని స్వర్గధామం చేసుకోవాలని కలలుగంటారు. ఉత్కంఠ, ఉద్వేగం, ఉత్సాహం, ఉరకలు వేసే ప్రాయంలో తమకంటూ కొన్ని ప్రత్యేకమైన క్షణాలను ప్రోదిచేసుకొని ఆ అనుభూతిని జీవితాంతం నిలుపుకోవాలని ఉవ్విళ్లూరుతారు.

ఇది ప్రపంచవ్యాప్తంగా యువత నిర్వహించుకొనే ప్రేమోత్సవం. వాలెంటైన్స్‌ రూపంలో ప్రేమ సందేశాల్ని పరస్పరం ఇచ్చిపుచ్చుకోవడంతో ఈ రోజుకు మరింత అనుబంధం ఉంది. హృదయాకృతులు, పావురాలు, విల్లు, బాణం ధరించిన రెక్కలున్న క్యుపిడ్‌ (గ్రీకుల ప్రేమదేవత పేరు, మన్మథుడు) బొమ్మలు ఆధునిక కాలంలో వాలెంటైన్‌ గుర్తులయ్యాయి. పావురాలతో వర్తమానాల దగ్గర నుంచి అంతర్జాల సందేశాల వరకూ నేడు ప్రతిదీ ప్రేమకు సాధనంగా మారిపోయింది.

వెర్రితలలు వేసిన విదేశీ సంస్కృతి వేలంవెర్రిగా మారిన సంబరాలు లవ్‌ బీచ్‌ ఫెస్టివల్స్‌ కాదు ప్రేమంటే ప్రేమ విశ్వజనీనమైనది. ఓ అద్భుతమైన అపూర్వమైన భావన. రెండు హృదయాల స్పందన. రెండు మనసుల తీర్మానం. ఇద్దరు వ్యక్తుల అర్థవంతమైన జీవన పయనం. కులమతాలకు, వయసు తారతమ్యాలకు, భాషాకు, ప్రాంతాలకు, సంస్కృతీ సంప్రదాయాలకు అతీతమైన బంధం. యుగాలు మారినా, తరాలు మారినా, నిత్యనూతనమైనది ప్రేమ. ఇది వాలెంటైన్‌తోనో, దేవదాసు పార్వతీలలో, లైలామజ్నూలతోనో మొదలవ్వలేదు.

అందుకే అంటాడో కవి ‘తాజ్‌మహల్‌ కూలినా ప్రేమ ఉంటుంది’ అని. మనిషి పుట్టినప్పుడే ప్రేమా పుడుతుంది. ప్రేమానుభూతి, అందులోని మాధుర్యం, గాఢత, జంటలో ఏ ఒక్కరు దూరమైనా మరొకరికి కలిగే ఆవేదన ఈ రోజు కొత్తగా పుట్టింది కాదు. ఎస్‌ఎంఎస్‌లు, మెయిల్స్‌, గ్రీటింగ్‌ కార్డులు, గిఫ్టులు ఇచ్చిపుచ్చుకోవటం లేటెస్ట్‌ ట్రెండ్‌ అయితే ఆ రోజుల్లో ప్రేమను వ్యక్తం చేయడానికి ప్రేమలేఖలు నడిచేవి. అందుకోసం రాజహంసలు, పావురాలతో రాయబారాలు నడిపితే భావకుడైన ప్రేమికుడు చందమామను మేఘాలను ప్రతీకలుగా చేసి ప్రేయసికి కవితాత్మక సందేశాలు పంపేవాడు.

మారుతున్న కార్పొరేట్‌ కల్చర్‌కు అనుగుణంగా ప్రేమ వ్యక్తీకరణకు సంబంధించిన అనేక బొమ్మలు, నమూనాలు మార్కెట్‌లోకి వచ్చాయి. ఇవన్నీ ప్రేమను వ్యక్తపరిచే చిహ్నాలుగా మారిపోయాయి. మొబైల్‌ ఫోన్లు, సోషల్‌మీడియా, ఈకామర్స్‌ వంటివి అందుబాటులోకి వచ్చిన తర్వాత ఈ వ్యక్తీకరణ స్వరూపంలోనూ చాలా మార్పొచ్చింది. ఎంత ప్రేమతో ఇచ్చారనే దానికంటే ఎంత ఖరీదైనది ఇచ్చారనేదానికే ప్రాధాన్యత పెరిగింది. ఇది వ్యాపార ప్రపంచం సృష్టించిన మాయాజాలం. ఈ మాయాజాలంలో నిజమైన ప్రేమకు గుర్తింపు లేకుండా పోయింది.

నిజమైన ప్రేమంటే? అనే ప్రశ్న తలెత్తుతోంది. తమ ప్రేమను ఎంత బాగా వ్యక్తీకరించగలిగితే అదే నిజమైన ప్రేమ అనుకునే పరిస్థితిని ఈ కార్పొరేట్‌ వ్యవస్థ కల్పించింది. పర్యవసానంగా బహుమతి లేకుండా ప్రేమను వ్యక్తం చేయలేని పరిస్థితిలోకి ప్రేమికుల్ని నెట్టేసింది. విషాదాంతమైన వాలెంటైన్స్‌ ప్రేమ పేరున నేడు సంబరాలు అంబరాన్ని అంటుతున్నాయి. ఆ సంబరాల్నీ వ్యాపారంగా మార్చుకునేవారు కొందరు. ఈ కార్పొరేట్‌ సంస్కృతి సృష్టించిన ప్రేమ వ్యాపారమయం అయిపోయింది. ఫిబ్రవరి 14న ప్రారంభమయ్యే ప్రేమికుల రోజు వారం ముందే అంటే ఫిబ్రవరి 7న రోజ్‌ డే పేరుతో ప్రారంభమవుతోంది. ఆ తర్వాత వరుసగా ప్రపోజ్‌ డే, చాక్లెట్‌ డే, టెడ్డీ డే, ప్రామిస్‌ డే, హగ్‌ డే, కిస్‌ డే, చివరిగా వాలెంటైన్స్‌ డే. ఇదంతా విదేశీ సంస్కృతే అయినా మనదేశంలోనూ విస్తృతంగానే వ్యాపించింది.

ఈ రోజులన్నింటా ప్రేమ పేరుతో ఆయా వస్తువుల వ్యాపారం ప్రపంచవ్యాప్తంగా పెద్దఎత్తున జరుగుతోంది. ప్రపంచవ్యాప్తంగా సుమారుగా 50 మిలియన్ల గులాబీలు అమ్ముడవుతున్నాయి. ఈ పువ్వులను 23 శాతం మహిళలు, 73 శాతం పురుషులు కొనుగోలు చేస్తున్నారట! సోషల్‌మీడియాలో, ఈకామర్స్‌ సైట్లలో డిస్కౌంట్లు సైతం తెగ ఊరిస్తుంటాయి. ఇవికాకుండా పబ్స్‌, పార్టీలు వంటి న్యూట్రెండ్‌కు నేడు హద్దూ అదుపూ లేదు. చేతితో రాసిన లేఖలను ఇచ్చే సంప్రదాయంగా 19వ శతాబ్దంలో ప్రారంభమైన ఈ ప్రేమ భారీ స్థాయిలో గ్రీటింగ్‌ కార్డుల తయారీకి, ప్రస్తుతం అంతర్జాల వేదికగా జరుగుతున్న బహుమతుల వ్యాపారంగా పరిణామం చెందింది.

గ్రేట్‌ బ్రిటన్‌లో 19వ శతాబ్దంలో వాలెంటైన్‌లను (ప్రేమ కానుకలను) పంపడం నాగరికమైంది. 1847లో ఈస్టర్‌ హౌలాండ్‌ అనే మహిళ మాసాచుసెట్స్‌లోని వర్సెస్టెర్‌లో ఉన్న తన ఇంటిలో బ్రిటీష్‌ నమూనాల్లో చేతితో వాలెంటైన్‌ కార్డులను తయారుచేసి, విజయవంతమైన వ్యాపారాన్ని అభివృద్ధిపరిచారు. 19వ శతాబ్దపు అమెరికాలో వాలెంటైన్‌ కార్డులు బాగా ప్రాచుర్యం పొందాయి. ఈ దేశంలో ఇప్పుడు ఎక్కువ వాలెంటైన్‌ కార్డులు ప్రేమ ప్రకటనలతో కాకుండా సాధారణ గ్రీటింగ్‌ కార్డులుగా తయారవుతున్నాయి.

నేడు ప్రపంచవ్యాప్తంగా ఒక బిలియన్‌కు పైగా వాలెంటైన్‌ కార్డులు పంపబడుతున్నట్లు గ్రీటింగ్‌కార్డుల సంఘం అంచనా వేసింది. ఏడాదిలో క్రిస్మస్‌ తర్వాత కార్డులు ఎక్కువగా పంపే రోజుగా వాలెంటైన్స్‌ డే గుర్తింపు పొందింది. ప్రేమికుల రోజున ఖరీదైన బహుమతులు ఇవ్వడం ఇప్పుడు నయా ట్రెండ్‌. గులాబీలు, చాక్లెట్లే కాకుండా నగలు, ఆభరణాలు, గ్రీటింగ్‌ కార్డులు, సాయంత్రం బయటకు తీసుకెళ్లడం, కొత్త దుస్తులు, గిఫ్ట్‌ కార్డులు / సర్టిఫికెట్లు వంటివి ఇచ్చిపుచ్చుకోవడం.. నేడు సరికొత్త ట్రెండ్‌.

వీటికోసం ఒక్క అమెరికాలోనే గతేడాది మొత్తం 19.7 బిలియన్‌ డాలర్లను ఖర్చు చేసినట్లు ‘నేషనల్‌ రిటైల్‌ ఫెడరేషన్‌’ అనే సంస్థ అంచనా. ఇది మునుపెన్నడూ చేయనంత ఖర్చు. దీన్నిబట్టి ఈ ఏడాది ఎన్ని బిలియన్‌ డాలర్లకు చేరుతుందో ఊహించవచ్చు. కార్పొరేటీకరణ పెరిగిన తర్వాత బంధాలు అనుబంధాలు వ్యాపారమయం అయ్యాయి. రోజుకో ప్రత్యేకతను ఆపాదించి దాన్ని వ్యాపారంగా మలచుకోవడం రివాజుగా మారింది. పుట్టినరోజు నుంచి చచ్చినరోజు వరకూ ప్రతిరోజూ పండగే.

ఇలా రోజుకో దినాన్ని ఏర్పాటు చేసుకొని, ప్రతి క్షణాన్ని వ్యాపారంగా మార్చి, సొమ్ము చేసుకుంటున్నారు. ఈ మాయాజాలంలో చాలామంది పడిపోతున్నారు. నిజమైన ప్రేమ లక్ష్యం పెళ్లే. ప్రేయసీప్రియులు వారి ప్రేమకు సార్థకత కల్పిస్తూ వివాహ బంధంతో ఒక్కటై నిండు నూరేళ్ళు భార్యాభర్తలుగా జీవితం కొనసాగించాలి. సామాజికంగా అటువంటి ప్రేమ సర్వదా ఆమోదయోగ్యం, అభిలషణీయం. అలా జరగనినాడు అది యువత వ్యక్తిత్వంపై మాయని మచ్చే. ప్రేమ రెండు హృదయాల ఆత్మీయ కలయికగా ఉండాలి.

బలవంతపు ప్రేమ, యాసిడ్‌ ప్రేమ, అంగీకరించకుంటే లైంగిక దాడి, హత్యలు, ఆత్మహత్యలకు పాల్పడటం ఇలాంటివే ప్రస్తుత సమాజంలో ప్రేమ పేరుతో జరుగుతున్న వైపరీత్యాలు. మానసిక పరిపక్వత కలిగిన ప్రేమ గెలిచినా, ఓడినా మధురంగా మరుపురానిదిగా ఉంటుంది. ప్రేమికులకు కావాల్సింది అందం, ఆకర్షణ కాదు మనోధైర్యం. అది ఉంటే ఈ భగప్రేమికుల ఆత్మహత్యలు ఉండవు. అటువంటి జీవితం భవిష్యత్తరాలకు మార్గదర్శకం అవుతుంది. మరిచిపోకుండా వాలైంటెన్స్‌ డే రోజున శుభాకాంక్షలు చెప్పుకుంటేనే ప్రేమకు అర్థం అంటే నీవూ, నేనూ ప్రేమికులమే కాదూ సెట్‌ చేసి అలారం వదిలేస్తే ప్రాణం లేని మోబైల్‌ కూడా నాకంటే ముందే శుభాకాంక్షలు చెప్పేస్తుంది.

అదీ నీవు కోరుకున్నట్లే ఫ్రీగా పెట్టగలిగే ఎస్‌ఎమ్‌ఎస్‌లతో ప్రేమని లెక్కలు వేయకండి. ఆ లెక్కలో నిన్ను ప్రాణానికి ప్రాణంగా ప్రేమించి, తన గుండెల్లో గుడి కట్టుకున్న నిజమైన మనస్సు గాల్లో కొట్టుకుపోవచ్చు. ప్రేమించేటప్పుడు మనసును లెక్కగట్టి ప్రేమించండి. ఎన్నో రకాలుగా డబ్బులు ఖర్చుపెట్టే అవసరం లేని హృదయంలో నుండి వచ్చే సహజమైన భావ వ్యక్తీకరణగా ప్రేమ ఉండాలి.