ఖమ్మం, సెప్టెంబర్ 21 (న్యూస్‌టైమ్): బంగారు తెలంగాణ నిర్మించడమే టీఆర్‌ఎస్‌ ప్రభుత్వ లక్ష్యమని ఖమ్మం పార్లమెంట్‌ సభ్యుడు పొంగులేటి శ్రీనివాసరెడ్డి అన్నారు. బధవారం ఖమ్మంలో వివిధ అభివృద్ధి పనులకు శంకుస్థాపన చేసిన ఆయన అనంతరం విలేఖరులతో మాట్లాడుతూ బంగారు తెలంగాణ సాధించే దిశగా టీఆర్‌ఎస్‌ ప్రభుత్వం పని చేస్తోందని అన్నారు. ఇందులో భాగంగానే ప్రతి ఇంటికి తాగునీరు, ప్రతి ఎకరానికి సాగునీరు అందించేందుకు మిషన్‌ భగీరథ, మిషన్‌ కాకతీయ లాంటి పథకాలను ప్రభుత్వం తెచ్చిందని అన్నారు.

ఈ పథకాలు మంచి సత్ఫలితాలను ఇస్తున్నాయని ఆయన అన్నారు. ఇతర రాష్ట్రాలు కూడా మిషన్‌ భగీరథ, మిషన్‌ కాకతీయ పథకాలను తమ తమ రాష్ట్రాలలో అమలు చేసేందుకు ఆసక్తి చూపుతున్నాయని అన్నారు. త్వరలోనే ఇళ్లు లేని పేదవారికి రెండు పడక గదుల ఇళ్లు ఇవ్వడం జరుగుతుందని అన్నారు. ముఖ్యమంత్రి కేసీఆర్‌ చేపడుతున్న అభివృద్ధి, సంక్షేమ పథకాలు చూసి ఇతర పార్టీల నుంచి పెద్ద ఎత్తున టీఆర్‌ఎస్‌లో చేరుతున్నారని అన్నారు. పేద ప్రజల శ్రేయస్సే లక్ష్యంగా ప్రభుత్వం పని చేస్తోందని అన్నారు. ప్రధాని మంత్రి మోడీ చేయించిన సర్వేలో అభివృద్ధి పథకాల అమలులో కేసీఆర్‌ ముందంజలో ఉండడం దీనికి నిదర్శనమని అన్నారు. ఈ కార్యక్రమంలో మాజీ శాసన సభ్యుడు కొండబాల కోటేశ్వరరావు, బొమ్మెర రామమూర్తి, తదితరులు పాల్గొన్నారు.

ప్రభుత్వ ప్రయోజనాలు వినియోగించుకోవాలి
ఖమ్మం, సెప్టెంబర్ 21 (న్యూస్‌టైమ్): ప్రైవేటు డెయిరీల ప్రలోభాలకు గురిగాకుండా ప్రభుత్వ విజయ డెయిరీకి పాలు పోస్తూ ప్రభుత్వం అందిస్తున్న ప్రయోజనాలను పొందాలని జిల్లా విజయ పాల ఉత్పత్తిదారుల సహకార సంఘం అధ్యక్షుడు సామినేని హరిప్రసాద్‌ అన్నారు. ఖమ్మం రోటరీనగర్‌లోని జిల్లా పాడి పరిశ్రమాభివృద్ధి సంస్థ ఆవరణలో జిల్లాస్థాయి పాల ఉత్పత్తిదారుల సమావేశం జరిగింది. ఈ సమావేశంలో హరిప్రసాద్‌ మాట్లాడుతూ ఆంధ్ర రాష్ట్ర ప్రాంత ప్రైవేటు డెయిరీలు రాష్ట్రంలోని పలు గ్రామాల్లో రైతుల వద్ద నుంచి పాలను సేకరిస్తూ తిరిగి ఆ పాలను ఈ ప్రాంత వాసులకు విక్రయిస్తూ లాభాలు గడిస్తున్నారన్నారు. కానీ విజయ డెయిరీ లాభాలల్లో 75 శాతం పాడి రైతులకే ఖర్చు చేస్తుందన్నారు. ప్రభుత్వం ప్రతి లీటరుకు ప్రోత్సాహకంగా రూ.4 చెల్లిస్తోందని తెలిపారు. ప్రభుత్వం పాల రైతులకు అనేక సబ్సిడీలను కూడా ఇస్తోందని, పాడి గేదెల కోసం వివిధ బ్యాంకుల నుంచి రుణ సదుపాయం కూడా కల్పిస్తున్నారని వివరించారు. అనంతరం డీఆర్‌డీఏ ప్రాజెక్టు డైరెక్టర్‌ మురళీధర్‌రావు, పశు సంవర్ధకశాఖ శాఖ జేడీ రఘోత్తమరెడ్డి మాట్లాడారు. కార్యక్రమంలో జిల్లా పాడి పరిశ్రమాభివృద్ధి సహకార సమాఖ్య ఉపసంచాలకుడు కె.కామేష్‌, జిల్లా సహకార బ్యాంక్‌ ముఖ్య కార్యనిర్వహణాధికారి వి.నాగచెన్నారావు, డీఎల్‌డీఏ చైర్మెన్‌ కొర్లకుంట నాగేశ్వరరావు, నాగేంద్ర, బోజెడ్ల వెంకటయ్య పాల్గొన్నారు.

మన్యం మండలాలతో కొత్త జిల్లా ఏర్పాటుకు డిమాండు
ఖమ్మం, సెప్టెంబర్ 21 (న్యూస్‌టైమ్): జిల్లాలోని అన్ని మన్యం మండలాలు కలిపి కొత్తగూడెం జిల్లాగా ఏర్పాటు చేయాలని సేవాలాల్‌ సేన, టీటీఎఫ్‌ రాష్ట్ర అధ్యక్షుడు సంజీవ్‌నాయక్‌ డిమాండ్‌ చేశారు. మన్యంలో గిరిజన చట్టాలు పకడబ్బందీగా ఉన్నప్పటికీ వీటన్నింటికి విరుద్ధంగా గ్రామ సభల తీర్మానాలు, అభిప్రాయ సేకరణ లేకుండా మన్యం మండలాలు మైదాన ప్రాంత జిల్లాలో కలుపుతున్నారని ఆయన విమర్శించారు. మైదాన ప్రాంత జిల్లాల్లో వీలినం చేయడంతో గిరిజనలు ఉద్యోగ,ఉపాధి అవకాశాలలో తీవ్ర నష్టం జరుగుతుందని పేర్కొన్నారు. రాజకీయ స్వార్ధ ప్రయోజనాలకు గిరిజనులను అన్యాయం చేస్తున్నారని అన్నారు. మన్యం మండలాలను మైదాన జిల్లాల్లో కలిపే ప్రతిపాదన విరమించుకోవాలని డిమాండ్‌ చేశారు. గిరిజనుల మనోభవాలను రక్షించాలని ఆయన కోరారు. జల్‌ జంగిల్‌, జమీన్‌ నినాదంతో పోరాటం చేసిన అమరవీరులు గిరిజన అమరవీరులు కోమరంభీమ్‌, రామునాయక్‌ స్ఫూర్తితో గిరిజనుల సమస్యలపై ఉద్యమించాలని ఆయన పిలుపునిచ్చారు. రాజీకయ ప్రయోజనాల కోసం గిరిజనులను బలి చేస్తున్న పాలకులకు వ్యతిరేకంగా పోరాటాలను ఉధృతం చేస్తామని ఆయన అన్నారు.