విజయవాడలోని శ్రీదుర్గామల్లేశ్వర స్వామి వార్ల దేవస్థానం భవానీ భక్తుల రద్దీతో కిటకిటలాడుతోంది. మరోవైపు, దేవస్థానం ఆధ్వర్యంలో ఐదు రోజులపాటు కొనసాగే భవానీ దీక్షల విరమణ కార్యక్రమం హోమ గుండాల్లో అగ్నిప్రతిష్టాపన కార్యక్రమంతో మంగళవారం ప్రారంభమైంది. ఇంద్రకీలాద్రిపై దుర్గామల్లేశ్వర స్వామి వార్లకు హారతి ఇచ్చిన తరువాత వేదపండితుల మంత్రోచ్ఛరణ మధ్య అర్జునవీధిలోని ఐదు హోమగుండాల్లో అగ్నిప్రతిష్టాపన చేశారు. ఉదయం 6.50 గంటలకు స్థానాచార్య శివప్రసాదశర్మ ఆధ్వర్యంలో హోమగుండం చుట్టూ ప్రదక్షిణలు నిర్వహించిన అనంతరం ఈవో సూర్యకుమారి దంపతులతో అగ్నిప్రతిష్ఠాపన కార్యక్రమాన్ని నిర్వహించారు.

అప్పటికే గిరిప్రదక్షిణ పూర్తి చేసి క్యూలైన్లో వేచి ఉన్న భవానీ దీక్షాధారులు జగన్మాత దుర్గమ్మ నామస్మరణ చేస్తూ అమ్మవారిని దర్శించుకున్నారు. వారికి క్యూలైన్లో ఓంకార మలుపు వద్ద దేవస్థానం సిబ్బంది లడ్డూ ప్రసాదాలు, అన్నప్రసాదం టోకెన్లు అందజేశారు. కెనాల్‌రోడ్డు వినాయకుడి గుడి నుంచి కుమ్మరిపాలెం సెంటరు వరకు భారీ పోలీసు బందోబస్తు ఏర్పాటు చేశారు. ఎటువంటి వాహనాలను అనుమతించకపోవడంతో భవానీ దీక్షాధారులు గిరిప్రదక్షిణ చేసేందుకు మార్గం సుగమం అయ్యింది. పద్మావతి, కృష్ణవేణి, పున్నమి ఘాట్ల వద్ద స్నానమాచరించిన భవానీ దీక్షాధారులు తొలుత టోల్‌గేటు సమీపంలోని కామధేను అమ్మవారి విగ్రహం వద్ద కొబ్బరికాయ కొట్టి గిరిప్రదక్షిణ ప్రారంభించారు.

కుమ్మరిపాలెం సెంటరు, కబేళా సెంటరు, చిట్టినగర్‌ ప్రాంతాల్లో భవానీ దీక్షాధారులకు కొంత మంది దాతలు అల్పాహారం, పండ్లు పంపిణీ చేశారు. కాగా, గత ఏడాది భవానీ దీక్షల విరమణ జరిగిన తరహాలోనే గురుభవానీలతో దీక్షాధారులకు మాలవిరమణ చేయించారు. దుర్గమ్మ దర్శనం చేసుకున్న దీక్షాధారులు మల్లికార్జున మహామండప మార్గంలో దిగువకు వచ్చిన తరువాత తొలుత ఇరుముడులు సమర్పించారు. ఇరుముడిలోని బియ్యం, పూజాద్రవ్యాలను ఒక హుండీలో, మరొక హుండీలో కానుకలను గురుభవానీలు వారితో వేయించారు.

అనంతరం నేతి కొబ్బరికాయ హోమగుండంలో వేసేందుకు ప్రత్యేకంగా ఏర్పాటు చేసిన క్యూలైన్లో వెళ్లారు. కాగా, భవానీ దీక్షల విరమణను పురస్కరించుకొని ఇంద్రకీలాద్రిపై యాగశాలలో శత చండీహోమం ప్రారంభించారు. ఐదురోజుల పాటు జరిగే శతచండీహోమం ఈ నెల 24న పూర్ణాహుతితో ముగుస్తుంది.