విశాఖపట్నం, అక్టోబబర్ 4 (న్యూస్‌టైమ్): భాషా శాస్త్రాలలో పరిశోధనలు పెరగాలని ఏయూ ఆర్ట్స్‌ కళాశాలప్రిన్సిపాల్‌ ఆచార్య కె.గాయత్రీ దేవి అన్నారు. మంగళవారం సాయంత్రం ఏయూలో లింగ్విస్టిక్‌ రీసెర్చ్‌ సొసైటీ ప్రధమ వార్షికోత్సవ సమావేశంలో ఆమె పాల్గొన్నారు. ఈ సందర్భంగా మాట్లాడుతూ యువతరం భావ ప్రకటన నైపుణ్యాలను, కమ్యూనికేషన్‌ స్కిల్స్‌ను పెంపొందించుకోవాలని సూచించారు. లింగ్విస్టిక్స్‌ రీసెర్చ్‌ సొసైటీ నిర్వాహకులను అభినందించారు. యువతరం చురుకైన భూమిక చూపుతూ ఇటువంటి సంస్థలను న్విహించడం భాషా వికాసానికి మేలు జరుగుతుందన్నారు. జర్నలిజం విభాగ బిఓఎస్‌ చైర్మన్‌ ఆచార్య డి.వి.ఆర్‌ మూర్తి మాట్లాడుతూ విభిన్న దేశాలలో భాష, సంసృతులను అధ్యయనం చేయాల్సిన ఆవశ్యకతను తెలియజేశారు.

అసిస్టెంట్‌ ప్రిన్సిపాల్‌ డాక్టర్‌ శ్రీమన్నారాయణ మూర్తి మాట్లాడుతూ దళిత సాహిత్యం, సమస్యలను ఎదుర్కొంటున్న మహిళలపై అధ్యయనం చేయడానికి లింగ్విస్టిక్‌ రీసెర్చ్‌ సొసైటీ చేస్తున్న కృషిని అభినందించారు. ఆచార్య యు.ఎన్‌ మూర్తి సమావేశానికి అద్యక్షత వహించి, నడిపించారు. సొసైటీ కార్యదర్శి చల్లా క్రిష్ణవీర్‌ అభిషేక్‌ సంస్థ లక్ష్యాలు, గత ఏడాది కాలంలో నిర్వహించిన కార్యక్రమాలు, భవిష్యత్‌ లక్ష్యాలను వివరించారు. కార్యక్రమంలో మౌనిక వురిటి తదితరులు ప్రసంగించారు. ఈ సందర్భంగా దళిత ఫెమినిజం అండ్‌ లింగ్విస్టిక్స్‌ డిస్టెన్స్‌ పుస్తకాన్ని ప్రిన్సిపాల్‌ ఆచార్య గాయత్రీ దేవి విడుదల చేశారు.