టీఆర్ఎస్ ప్రభుత్వం ఆంధ్రా కాంట్రాక్టర్ల కొమ్ము కాస్తోందని కాంగ్రెస్‌ ఎమ్మెల్యే వంశీచంద్‌రెడ్డి ఆరోపించారు. సాగునీటి ప్రాజెక్ట్‌ల కాంట్రాక్టుల్లో ఎక్కువ భాగం ఏపీ కాంట్రాక్టర్లకే అప్పగించారన్నారు. పాలమూరు రంగారెడ్డి ఎత్తిపోతల పథకం పంప్‌హౌస్‌ డిజైన్ల మార్పులో కోట్లాది రూపాయలు చేతులు మారాయని సోమవారం ఇక్కడ ఆరోపించారు. కమిషన్లకు ఆశపడి మంత్రి జూపల్లి కృష్ణారావు డిజైన్ మార్పులకు సహకరించాలని వంశీచంద్ రెడ్డి ఆరోపించారు. అయితే, పాలమూరు-రంగారెడ్డి పోత్తిపోతల పథకం డిజైన్ల మార్పు వ్యవహారంలో ముడుపులు చేతులు మారాయంటూ కాంగ్రెస్‌ ఎమ్మెల్యే వంశీచంద్‌రెడ్డి చేసిన ఆరోపణలను పంచాయతీరాజ్‌ శాఖ మంత్రి జూపల్లి కృష్ణారావు తిప్పికొట్టారు. అవినీతి కాంగ్రెస్‌ నేతల నైజమని విమర్శించారు. స్వచ్ఛమైన పాలన అందిస్తున్న టీఆర్ఎస్‌ను వేలెత్తి చూపే నైతిక హక్కు కాంగ్రెస్‌కు లేదని కృష్ణారావు సోమవారం తనను కలిసిన మీడియా వద్ద మండిపడ్డారు.