పాతికేళ్ల బీజేపీ శివసేన కలహాల కాపురం కథ కంచికేనన్న సంకేతాలు వెలువడుతున్నాయి. స్థానిక సంస్థల ఫలితాలు ఎలా ఉన్నా తొలిసారిగా మహారాష్ట్రలో కొలువుదీరిన బీజేపీ ప్రభుత్వానికి పెనుగండం పొంచి ఉందన్న అనుమానాలు వ్యక్తమవుతున్నాయి. ఎన్నికల సమయంలో బీజేపీ, శివసేన కీచులాటలు, విడిగా పోటీ చేయడాలు గతంలోనూ జరిగాయి. ఆ తర్వాత రెండు పార్టీలూ కలిసిపోయాయి. మహారాష్ట్ర స్థానిక సంస్థల ఎన్నికలు అధికార బీజేపీకి అగ్నిపరీక్షగా మారాయి. అటు కేంద్రంలో ఇటు రాష్ట్రంలో బీజేపీతో అధికారం పంచుకుంటున్న మిత్రపక్షం శివసేన ఈ ఎన్నికల్లో ఒంటరిగానే పోటీకి దిగుతున్నది. భవిష్యత్తులో ఇక బీజేపీతో కలిసేది లేదని శివసేన అధినేత ఉద్ధవ్ ఠాక్రే ప్రకటించారు. మహారాష్ట్ర ముఖ్యమంత్రి ఫడ్నవీస్ క్యాబినెట్‌లోని 12 మంది శివసేనకు చెందిన మంత్రులు రాజీనామాలు ఇవ్వడానికి సమాయత్తమయ్యారు. కేంద్ర క్యాబినెట్‌లో కొనసాగుతున్న ఏకైక శివసేన మం త్రి అనంతగీతె కూడా అదేదారిలో ఉన్నారు కాబట్టి ఫడ్నవీస్ ప్రభుత్వానికి ప్రమాదమేమీ ఉండదన్న భరోసాతో బీజేపీ స్థానిక సంస్థల ఎన్నికలకు మరో రెండు పార్టీలు రిపబ్లికన్ పార్టీ ఆఫ్ ఇండియా (ఎ), రెవల్యూషనరీ సోషలిస్టు పార్టీ (జె)తో కలిసి రంగంలోకి దిగింది. ప్రస్తుతం జరుగుతున్న ఐదు రాష్ట్రాల అసెంబ్లీ ఎన్నికల పోరులో మహారాష్ట్ర స్థానిక సంస్థల ఎన్నికలకు అంతగా ప్రాచుర్యం దక్కకపోయినా ఇవికూడా దాదాపు అదే స్థాయిలో ప్రాధాన్యం కలిగినవే. ప్రత్యేకించి దేశ ఆర్థిక రాజధాని ముంబయి మహానగర పాలక సంస్థకు జరుగనున్న ఎన్నికలు బీజేపీకి ప్రతిష్ఠాత్మకంగా మారాయి. కేవలం ఈ నగరంలోనే కోటికి పైగా ఓటర్లు ఆరు లోక్‌సభ స్థానాలు, 36 శాసనసభా స్థానాలున్నాయి. ఈ నేపథ్యంలో శివసేన శత్రు వైఖరి బీజేపీకి కంటగింపుగా మారింది. 2014 ఎన్నికల్లో తప్ప అంతకు ముందూ, ఆ తర్వాత జరిగి న అన్ని చట్టసభల ఎన్నికల్లో బీజేపీతో శివసేన సమవుజ్జీగా నిలిచింది. కానీ ముంబయి మున్సిపల్ సీట్ల పంపకంలో తలెత్తిన విభేదాలు తీవ్రరూపం దాల్చి, పొత్తు వికటించి కత్తులు దూసుకునేదాకా పోయింది. 227 సీట్లు న్న ముంబై కార్పొరేషన్‌లో బీజేపీ 114 సీట్లు ఆశిస్తే శివసేన ఇవ్వజూపినవి కేవలం 60 కావడమే అందుక్కారణం. గత లోక్‌సభ ఎన్నికల్లో కలిసి పోటీచేసిన బీజేపీ, శివసేన జంట ముంబై పరిధిలోని ఆరు లోక్‌సభ స్థానాల్లో చెరి మూడు చొప్పున గెలుచుకున్నాయి. ఆ వెంటనే జరిగిన అసెంబ్లీ ఎన్నికల్లో ఈ రెండు పార్టీలు విడివిడిగా పోటీ చేసిన నగరంలోని 36 అసెంబ్లీ స్థానాల్లో బీజేపీ 15 గెలుచుకుంటే, అందుకు ధీటుగా శివసేన 14 గెల్చుకుంది. ఈ లెక్కన ముంబయి నగరపాలక సంస్థలో కూడా పంపకాలు ఫిఫ్టీ ఫిఫ్టీ ప్రకారం ఉండాలన్న బీజేపీ ప్రతిపాదనను శివసేన తోసిపుచ్చింది. అందుకు గల కారణం గత రెండు దశాబ్దాలుగా ముంబైపై శివసేన అప్రతిహత ఆధిపత్యం ఒకటైతే బీజేపీతో వివిధ అంశాల్లో కొనసాగుతున్న వైరుధ్యం రెండవది.మోదీ క్యాబినెట్‌లో కొనసాగుతున్న శివసేన ఆ ప్రభుత్వానికే వ్యతిరేకంగా మాట్లాడటం బలం లేకపోయినా వివిధ రాష్ట్రాల్లో బీజేపీకి వ్యతిరేకంగా పోటీ చేయడం, మహారాష్ట్రలో ఫడ్నవీస్ ప్రభుత్వాన్ని నిత్యం సతాయించడం, శివసేన సొంత పత్రిక సామ్నాలో బీజేపీని విమర్శి స్తూ సంపాదకీయాలు గుప్పించడం, కమల దళానికి కంటిమీద కునుకు లేకుండా చేశాయి. ఇంతకాలం భరిస్తూ వచ్చిన బీజేపీకి గత రెండేళ్లుగా మహారాష్ట్రలో జరిగిన ఎన్నికలు గొప్ప స్థైర్యాన్నిచ్చాయి. గత లోక్‌సభ ఎన్నికల్లో బీజేపీ, శివసేన కలిసి పోటీచేశాయి. బీజేపీ 23, శివసేన 16 సీట్లను గెలుచుకున్నాయి. ఆ తర్వాత జరిగిన అసెంబ్లీ ఎన్నికల్లో బీజేపీ శివసేనతో పొత్తు లేకుండానే తిరుగులేని ఆధిపత్యాన్ని సాధించింది. 288 అసెంబ్లీ స్థానాల్లో 122 గెల్చుకొని మ్యాజిక్ ఫిగర్‌కు దూరంలో ఆగిపోయింది. ఆ ఎన్నికల్లో 65 సీట్లు గెల్చుకున్న శివసేన తొలుత ఫడ్నవీస్ ప్రభుత్వానికి మద్దతు ఇవ్వకుండా మొరాయించింది. ఒక దశలో స్పీకర్‌పై అవిశ్వాస తీర్మానానికి సాహసించింది. అయితే 41 సీట్లు గెల్చిన శరద్‌పవార్ నాయకత్వంలోని ఎన్సీపీ, బీజేపీ ప్రభుత్వానికి అండగా ఉండబోతుందన్న సంకేతాలు రావడంతో శివసేన దారికొచ్చింది. ఫడ్నవీస్ క్యాబినెట్‌లో చేరింది. కేంద్ర ప్రభుత్వాన్ని రాష్ట్ర ప్రభుత్వాన్ని నిరంతరం ఇరుకున పెడుతున్న శివసేనతో ఇక వేగలేమంటూ బీజేపీ శ్రేణులు అధిష్ఠానంతో మొరపెట్టుకున్నాయి. అడపాదడపా ఎన్నికల్లో ఒడిదుడుకులు ఎదుర్కొన్నప్పటి కీ నోట్ల రద్దు తర్వాత జరిగిన స్థానిక సం స్థల ఎన్నికల్లో బీజేపీ మంచి ఫలితాలను సాధించింది. మరోవైపు ఎన్సీపీ నేత శరద్‌పవార్ బీజేపీతో సఖ్యంగానే ఉంటున్నారు. స్థానిక సంస్థల ఎన్నికల తర్వాత శివసేన యథావిధిగా బీజేపీతో కలిస్తే మహారాష్ట్రలోని ఫడ్నవీస్ ప్రభుత్వానికి డోకా ఉండదు.