ఏలూరు: ప్రజాసమస్యల పరిష్కారానికి ఇటీవల నిర్వహించిన జన్మభూమి కార్యక్రమానికి మంచి స్పందన లభించిందని అందులో అందిన ప్రతీ వినతిని పరిశీలించి తగు పరిష్కార చర్యలు తీసుకోవడం జరుగుతుందని ఏలూరు ఆర్‌డిఓ నంబూరి తేజ్‌ భరత్‌ చెప్పారు. స్ధానిక ఆర్‌డిఓ కార్యాలయంలో సోమవారం నిర్వహించిన మీ-కోసం కార్యక్రమంలో వివిధ సమస్యలపై ప్రజల నుండి వచ్చిన వినతులను ఆయన స్వీకరించారు. ఈసందర్భంగా ఆయన మాట్లాడుతూ అర్హులైనవారందరికీ ఇప్పటికే పెన్షన్లు, రేషన్‌ కార్డులు అందించడం జరిగిందని ఇంకా ఎవరైనా అర్హులు మిగిలి ఉంటే వారి నుండి కూడా జన్మభూమి కార్యక్రమంలో వినతులు స్వీకరించడం జరిగిందన్నారు.

వీటిని పరిశీలించి ప్రభుత్వాదేశాలమేరకు తగు చర్యలు తీసుకోవడం జరుగుతుందన్నారు. భూమి, తదితర వివాదాల సత్వర పరిష్కారానికి తమ ప్రాంత తహశీల్ధారు దృష్టికి తీసుకువెళితే తగు చర్యలు తీసుకుంటారని అక్కడ పరిష్కారం కానీ సమయంలో మాత్రమే ఏలూరు వచ్చి అందించాలే తప్ప వ్యయప్రయాసలకోర్చి ఇంత దూరం రానవసరం లేదన్నారు. ప్రజాసాధికారిత సర్వే కూడా పూర్తయ్యిందని దీనిపై తదుపరి తీసుకోవాల్సిన చర్యలను ప్రభుత్వం చేపట్టిందన్నారు. కోర్టు పరిధిలో ఉన్న, వ్యక్తిగతానికి సంబంధించిన వినతులను మీ-కోసంకు తీసుకురావద్దన్నారు. మీ-కోసంలో అందిన ప్రతీ వినతిని పరిశీలించి అర్హతమైనవాటిని తక్షణమే పరిష్కరించడం జరుగుతుందని ఈ సందర్భంగా ఆయన చెప్పారు. ఈ మీ-కోసం కార్యక్రమంలో వివిధ శాఖల డివిజినల్‌ అధికారులు పాల్గొన్నారు.