విశాఖపట్నం, సెప్టెంబర్ 22 (న్యూస్‌టైమ్): రాష్ట్రానికి ప్రత్యేక హోదాపై ప్రజా తీర్పు కోరుతూ పీసీసీ ఇచ్చిన పిలుపు మేరకు విశాఖ ఉత్తర నియోజకవర్గంలో ప్రజా బ్యాలెట్‌ కార్యక్రమాన్ని నిర్వహించారు. ఈ కార్యక్రమాన్ని కాంగ్రెస్ పార్టీ సీనియర్ నేత, మాజీ మంత్రి వట్టి వసంతకుమార్‌ ప్రారంభించారు. టిడిపి, బిజెపి రెండేళ్ళ పాలనా వైఫల్యాలు, హామీల అమలులో వంచన, ప్రత్యేక హోదాపై చేస్తున్న ద్రోహం తదితర అంశాలతో రూపొందించిన కరపత్రాన్ని పార్టీ నేతలతో కలిసి గురువారం ఇక్కడ అవిష్కరించారు.

ఈ సందర్భంగా ఆయన మాట్లాడుతూ అధికారంలోనికి రాకముందు ప్రత్యేక హోదా పదేళ్ళు కావాలన్న వెంకయ్యనాయుడు అదికారంలోనికి వచ్చాక హోదా అలంకరప్రాయమని చెప్పడం సరికాదన్నారు. విభజనకు బీజం వేసింది బిజెపి పార్టీయేనని విమర్శించారు. విశాఖ ఉత్తర నియోజకవర్గం ఇన్‌చార్జి గుంటూరు బారతి అధ్యక్షతన జరిగిన కార్యక్రమంలో మాజీ ఎమ్మెల్యే ,పీసీసీ ప్రధాన కార్యదర్శి ద్రోణంరాజు శ్రీనివాస్‌, నగర కాంగ్రెస్‌ అధ్యక్షుడు బెహరా బాస్కరావు, మహిళా కాంగ్రెస్‌ అధ్యక్షురాలు పేడాడ రమణీకుమారి, కాంగ్రెస్‌ పార్టీ సీనియర్‌ నాయుకులు గుంటూరు వెంకటనరసింహారావు, పార్టీ పరిశీలకులు రాజా, యడ్ల అదిరాజు, ఉత్తర నియోజకవర్గం నాయకులు, వార్డు అధ్యక్షులు పాల్గోన్నారు.

ఫిల్మ్‌ ఫెస్టివల్‌ ప్రారంభం
విశాఖపట్నం, సెప్టెంబర్ 22 (న్యూస్‌టైమ్): తెలుగు టాకీ సినిమా 85 ఏళ్లు పూర్తి చేసుకున్న సందర్భంగా వైజాగ్‌ ఫిల్మ్‌ సొసైటీ నిర్వహిస్తున్న మూడు రోజుల ఫిల్మ్‌ ఫెస్టివల్‌ పౌరగ్రంథాలయంలో ప్రారంభమయింది. కార్యక్రమానికి ముఖ్య అతిథిగా హాజరైన సినీ నటుడు గొల్లపూడి మారుతీరావు ఉత్సవాలను ప్రారంభించారు. ఈ సందర్భంగా ఆయన మాట్లాడుతూ తెలుగు సినిమాకు ప్రాణం పోసి, సినిమా అభివృద్ధికి త్యాగాలు చేసిన ఎందరో మహానుభావులను గుర్తుపెట్టుకోవడంలో మనం విఫలమయ్యామన్నారు. భక్తప్రహ్లాద తొలి తెలుగుటాకీ సినిమాగా సెప్టెంబర్‌ 15, 1931లో విడుదలైనపుడు సినిమాకు దర్శకత్వం వహించి, నిర్మించిన హెచ్‌.ఎం.రెడ్డిని అందరూ ఎంతో అభినందించారన్నారు. నేడు అలాంటి మహనీయులను మర్చిపోతున్నామని ఆవేదన వ్యక్తం చేశారు. తెలుగు సినిమా రంగం అభివృద్ధికి కృషి చేసిన మహనీయులు గుర్తుపెట్టుకోవాల్సిన అవసరం ఉందన్నారు. ఈ సందర్భంగా 1939లో నిర్మించిన ‘మళ్లీ పెళ్లి’ సినిమాను ప్రదర్శించారు. కార్యక్రమంలో విశాఖ ఫిల్మ్‌ సొసైటీ కార్యదర్శి నరవ ప్రకాశరావు, సహాయ కార్యదర్శి పి.వి.రమణ, రచయిత డి.వి.సూర్యారావు పాల్గొన్నారు. కాగా, ఈనెల మొదటి వారంలో ప్యారిస్‌లో జరిగిన అంతర్జాతీయ హిందీ సమ్మేళనంలో పాల్గొన్న ఏయూ హిందీ పరిశోధక విద్యార్థిని బుద్దా హేమలతను వీసీ ఆచార్య నాగేశ్వరరావు అభినందించారు. హిందీ సమ్మేళనంలో పాల్గొన్న హేమలత హిందీ సాహితీ ప్రక్రియల వైశిష్ట్యాన్ని భాషాపరంగా తెలిపే పలు పరిశోధన పత్రాలను ఈ సందర్భంగా సమర్పించారు. నవలా రచయిత్రి మృణాల్‌పాండే నవల పటరంగపుర్‌ పురాణ్‌లోని భాషాపరమైన చైతన్యాన్ని వివరిస్తూ హేమలత సమర్పించిన పరిశోధన పత్రాలు హిందీ సదస్సులో ప్రశంసలు పొందాయని తెలిపారు. మరిన్ని పరిశోధనలు చేసి హేమలత హిందీ భాషలో ఉన్నత స్థానాలు పొందాలని వీసీ ఆచార్య నాగేశ్వరరావు ఆకాంక్షించారు. హిందీ విభాగా ఆచార్యులు ఎన్‌.సత్యనారాయణ, సయ్యద్‌ మెహరూన్‌, బి.మోహని తదితరులు హేమలతను అభినందించారు.

విశాఖలో లారీ ఢీకొని వ్యక్తి మృతి
విశాఖపట్నం, సెప్టెంబర్ 22 (న్యూస్‌టైమ్): నక్కపల్లి జాతీయ రహదారిపై గురువారం జరిగిన రోడ్డు ప్రమాదంలో ఓ యువకుడు మృతి చెందగా మరొకరికి తీవ్ర గాయాలయ్యాయి. ఎస్‌. రాయవరం మండలం గుర్రాజుపేటకు చెందిన అన్నదమ్ములు చొప్పా మంగరాజు(25), గోవిందు (28) ద్విచక్ర వాహనంపై తుని వెళ్తుండగా నక్కపల్లి వద్దకు రాగానే వెనుక నుంచి వచ్చిన లారీ వీరి వాహనాన్ని ఢీకొట్టింది. ఈ ప్రమాదంలో మంగరాజు అక్కడికక్కడే మృతి చెందగా గోవిందు తీవ్రంగా గాయపడ్డాడు. స్థానికుల సహాయంతో పోలీసులు గాయపడ్డ గోవిందును చికిత్స నిమిత్తం నక్కపల్లి ప్రభుత్వ ఆసుపత్రికి తరలించారు. కాగా, మద్యం మత్తులో భార్యను కత్తితో పొడిచి హతమార్చిన సంఘటన మండలంలో కించుమండ సంతబయలులో చోటుచేసుకుంది. హుకుంపేట మండలం పాతకోట పంచాయతీ ఎకరూడి గ్రామానికి చెందిన పాంగి పాలో, పాంగి చిత్రో దంపతులు. ఇద్దరు వారపు సంతకు వచ్చారు. నిత్యావసర సరకులను కొనుగోలు చేసుకుని తిరుగు ప్రయాణంలో ఇద్దరు మద్యం సేవించారు. ఈ సందర్భంలో వారి మధ్య చిన్నపాటి గొడవ ఏర్పడడంతో కోపోద్రిక్తుడైన భర్త చిత్రో తన భార్య పాలో(55)ను కత్తితో మెడమీద పొడిచాడు. దీంతో పాలో అక్కడున్న సాయిబాబా గుడి పక్కన కుప్పకూలిపోయింది. మహిళ రక్తపు మడుగులో పడి ఉండటాన్ని గమనించిన స్థానికులు 108కు సమాచారం అందించారు. అయితే అంబులెన్స్‌ వచ్చేసరికి పరిస్థితి విషమించి అప్పటికే మృతి చెందినట్లు 108 సిబ్బంది తెలిపారు. ఈ విషయంపై ఎస్సై మన్మథరావు కేసు నమోదు చేసి దర్యాప్తు చేస్తున్నారు.