కోహ్లీ, టెండూల్కర్‌ అంత పెద్ద స్టార్‌గా ఎదిగే నైపుణ్యాలు గిల్‌కు ఉన్నాయని రాబిన్‌ ఊతప్ప పేర్కొన్నాడు. 23 ఏళ్ల ఈ యువ ఆటగాడు అసాధారణ క్రికెట్‌ నైపుణ్యాలు చూపిస్తున్నాడని ప్రశంసించాడు. అసాధారణమైన ఫామ్‌లో ఉన్న అద్భుత ఆటగాడిగా అతనిని అభివర్ణించాడు. ఈ మేరకు ఓ వార్తా సంస్థతో తన అభిప్రాయాలను ఊతప్ప పంచుకున్నాడు.గడిచిన ఏడాది కాలంలో శుభ్‌ మన్‌ గిల్‌ టీమిండియా తరఫున కూడా అదరగొట్టాడు. టీ20, టెస్ట్‌, వన్డేల్లో సెంచరీలు సాధించాడు. ఈ ఏడాది జనవరిలో న్యూజిలాండ్‌ పై 208 పరుగులు చేసి, వన్డేల్లో డబుల్‌ సెంచరీ సాధించిన యువ ఆటగాడిగా గుర్తింపు తెచ్చుకోవడం గమనార్హం.
గుజరాత్‌ టైటాన్స్‌ యువ క్రికెటర్‌ శుభ్‌ మన్‌ గిల్‌ ఐపీఎల్‌ 2023 సీజన్‌ లో బ్యాటుతో అదరగొడుతున్నాడు. గత సీజన్‌ లోనూ గిల్‌ గుజరాత్‌ టైటాన్స్‌ విజయాల్లో కీలక భూమిక పోషించాడు. అదే విధంగా ఈ ఏడాది కూడా తన ఫామ్‌ను కొనసాగిస్తున్నాడు. దీంతో శుభ్‌ మన్‌ గిల్‌ భవిష్యత్తులో విరాట్‌ కోహ్లీ లేదా సచిన్‌ టెండూల్కర్‌ మాదిరే టీమిండియాకు కీలక ఆటగాడిగా మారతాడన్న అభిప్రాయాన్ని మాజీ క్రికెటర్‌ రాబిన్‌ ఊతప్ప వ్యక్తం చేశాడు.