మెదక్‌ జిల్లాలోని పుల్కల్‌ మండలంలో సింగూర్‌ ప్రాజెక్టు వరద కాలువల తవ్వకాల పనులపై నీలినీడలు కమ్ముకున్నాయి. సంవత్సర కాలంలో పూర్తి కావాల్సిన పనులు ఒక అడుగు ముందుకు నాలుగు అడుగులు వెనుక్కు నడుస్తోంది. ఏళ్లు గడుస్తున్నా పూర్తి కావడం లేదు. 2006లో దివంగత ముఖ్యమంత్రి వైఎస్‌ రాజశేఖర్‌రెడ్డి వరద కాలువల తవ్వకాల పనులకు శంకుస్థాపన చేశారు.

సింగూర్‌ జలాశయం నుండి అందోల్‌ పెద్ద చెరువు వరకు 24 కిలోమిటర్ల మేర ప్రధాన కాలువ దానికింద మరో 60 కిలోమీటర్ల మేర ఉప పిల్లకాలువలు తవ్వి ఆయకట్టుకు నీరందించేందుకు 88.89 కోట్ల రూపాయలను ప్రభుత్వం మంజూరు చేసింది. పుణేకు చెందిన మహలక్ష్మి కన్‌స్ట్రక్షన్స్‌ సంస్థ టెండర్‌ను దక్కించుకుంది. ఒప్పందం ప్రకారం ఏడాది కాలంలో పనులను పూర్తి చేయాల్సి ఉన్నా నేటికీ కాలువల తవ్వకాల పనులు మాత్రం ముందుకు సాగడం లేదు.

ప్రధాన కాలువ తవ్వకం పనులను పూర్తి చేసినా దానిపై వంతెనలు, చెక్‌డ్యామ్‌లు, కల్వర్టులు, సిమెంటు లైనింగ్‌ పనులు ఇప్పటికింకా మూడోవంతు కూడా పూర్తి కాలేదు. ఎడతెగని జాప్యం కారణంగా తవ్విన పిల్లకాలువలు చెట్లు పొదలతో పూడుకుపోయింది. కోర్టులో కేసులు పెండింగులో ఉండడం వల్ల పనులలో జాప్యం జరుగుతోందని సింగూర్‌ డిఈ జగన్నాధం అన్నారు. మరోవైపు 40 వేల ఎకరాల ఆయకట్టుకు సాగునీరందించే లక్ష్యంతో ప్రభుత్వం నిధులను సైతం భారీగానే కేటాయించింది.

తొలుత 35 కోట్ల రూపాయలు ఆ తర్వాత 2011-12లో ఏకంగా 45 కోట్లు కేటాయించింది. ప్రాజెక్టును పూర్తి చేయించడంలో నీటిపారుదల శాఖ విఫలమవుతోందనే విమర్శులు వెల్లువెత్తుతున్నాయి. ఉప ముఖ్యమంత్రి దామోదర్‌ రాజనర్సింహ జిల్లా సమస్యలను పట్టించుకోవడం లేదని స్థానిక నేతలు విమర్శిస్తున్నారు. కాలువ పనుల కోసం తమ భూమిని ఇచ్చినా ప్రయోజనం లేకుండా పోయిందని రైతులు వాపోతున్నారు. ప్రజాధనాన్ని దోచుకోవడానికే నేతలు, కాంట్రాక్టర్లు పనుల్లో జాప్యం చేస్తున్నారని రైతులు ఆగ్రహం వ్యక్తం చేస్తున్నారు.

కాలువ పనులు సకాలంలో పూర్తయి ఉంటే వేల ఎకరాల్లో పంటలు సాగులోకి వచ్చి రైతన్నలకు లాభం చేకూరేది. ఇప్పటికైనా ప్రభుత్వం స్పందించి సింగూర్‌ ప్రాజెక్టు కాలువ తవ్వకాల పనులను పూర్తి చెయ్యాల్సిన అవసరం ఎంతైనా ఉంది.