కోల్‌కతా: ఐపీఎల్‌లో కోల్‌కతా నైట్‌రైడర్స్ దూసుకుపోతున్నది. ఈ మాజీ చాంపియన్ సొంతగడ్డ ఈడెన్‌లో సూపర్ రికార్డును నిలబెట్టుకుంటూ మరో ఘన విజయాన్నందుకుంది. శుక్రవారం జరిగిన పోరులో కోల్‌కతా 7 వికెట్ల తేడాతో ఢిల్లీని చిత్తు చేసింది. టాస్ ఓడి తొలుత బ్యాటింగ్‌కు దిగిన ఢిల్లీ.. సంజు శాంసన్ (38 బంతుల్లో 60; 4 ఫోర్లు, 3 సిక్సర్లు), శ్రేయాస్ అయ్యర్ (34 బంతుల్లో 47; 4 ఫోర్లు, ఓ సిక్స్) రాణించడంతో నిర్ణీత ఓవర్లలో 6 వికెట్ల నష్టానికి 160 పరుగులు చేసింది. నైట్‌రైడర్స్ బౌలర్ కల్టర్‌నీల్ 3 వికెట్లతో అదరగొట్టాడు. తర్వా త గంభీర్ (52 బంతుల్లో 71 నాటౌట్; 11 ఫోర్లు) అజేయ ఇన్నింగ్స్‌కు ఉతప్ప (33 బంతుల్లో 59; 5 ఫోర్లు, 4 సిక్సర్లు) ప్రదర్శన తోడవడంతో నైట్‌రైడర్స్ 3 వికెట్లు మాత్రమే నష్టపోయి మరో 22 బంతులుండగానే సులువుగా లక్ష్యాన్ని అందుకుంది. రబాడకు 2వికెట్లు దక్కాయి. గంభీర్‌కు మ్యాన్ ఆఫ్ ది మ్యాచ్ అవార్డు లభించింది.
కోల్‌కతా విజయాల్లో కీలకపాత్ర పోషిస్తున్న కెప్టెన్ గంభీర్.. ఉతప్ప మరోసారి చెలరేగారు. జట్టు స్కోరు 9 పరుగుల వద్ద ఓపెనర్ సునీల్ నరైన్ (4).. రబాడ బౌలింగ్‌లో క్లీన్‌బౌల్డ్‌గా వెనుదిరిగాడు. ఆ తర్వాత గంభీర్‌తో కలిసి ఉతప్ప స్కోరుబోర్డును నడిపించాడు. కేవలం 23 బంతుల్లోనే ఉతప్ప అర్ధసెంచరీ పూర్తి చేసుకోవడంతోపాటు గంభీర్‌తో కలిసి రెండో వికెట్‌కు 108 పరుగులు జతచేశాడు. ఆ తర్వాత 13వ ఓవర్లో 2వ బంతికి కరుణ్ నాయర్ విసిరిన డైరెక్ట్ త్రోకు ఉతప్ప రనౌట్‌గా వెనుదిరిగాడు. ఉతప్ప స్థానంలో వచ్చిన మనీశ్ పాండే (5) నిరాశపరిచినా, గంభీర్ మాత్రం చివరిదాకా క్రీ జులో నిలబడి జట్టుకు అండగా నిలిచాడు. షెల్డన్ జాక్సన్ (5 బంతుల్లో 12 నాటౌట్)తో కలిసి వరుసగా బౌండరీలు కొడుతూ అర్ధసెంచరీ పూర్తి చేసుకున్న గంభీర్ 71 పరుగులతో నాటౌట్‌గా నిలిచాడు.

ఢిల్లీకి ఆరంభంలోనే ఎదురుదెబ్బ తగిలింది. ఐదోఓవర్లో నాయర్ (15)ను నరైన్ ఎల్బీగా ఔట్ చేయడంతో 48 పరుగుల వద్ద ఢిల్లీ తొలి వికెట్ కోల్పోయింది. ఈ దశలో క్రీజులోకొచ్చిన శ్రేయాస్ అయ్యర్‌తో కలిసి మరో ఓపెనర్ సంజూ ఇన్నింగ్స్ నడిపించాడు. శ్రేయాస్-సంజూ జోడీ రెండో వికెట్‌కు 75 పరుగులు జోడించారు. ప్రమాదకరంగా మారిందనుకున్న ఈ జోడీని 13వ ఓవర్ చివరిబంతికి సంజూను ఉమేశ్ యాదవ్ ఎల్బీగా ఔట్ చేసి విడదీశాడు. మరో 9 పరుగుల తర్వాత రిషభ్ పంత్ (6)ను ఎల్బీగా ఔట్ చేసిన కల్టర్‌నీల్.. 4 బంతుల తేడాతో శ్రేయాస్‌ను కూడా ఎల్బీగా పంపాడు. ఇక్కడినుంచి ఢిల్లీ జట్టు కోలుకోలేకపోయింది. ఆ తర్వాత వచ్చిన మోరిస్ (11), ఆండర్సన్ (2)లు తీవ్రంగా నిరాశపరచగా.. బవానే 12 పరుగులతో నాటౌట్‌గా నిలిచాడు. కోల్‌కతా బౌలర్లు కట్టుదిట్టంగా బంతులేయడంతో చివరి 5 ఓవర్లలో ఢిల్లీ జట్టు 29 పరుగులే చేయగలిగింది.