సుప్రీంకోర్టు ప్రధాన న్యాయమూర్తి (సీజేఐ) జేఎస్ ఖేర్కర్ తో పాటు, మరో ఆరుగురు సుప్రీంకోర్టు జడ్జిలకు ఐదేళ్ల జైలు శిక్ష విధిస్తున్నానని కోల్ కతా హైకోర్టు న్యాయమూర్తి జస్టిస్ కర్ణన్ సంచలన ప్రకటన చేశారు. ఓ దళిత జడ్జికి వ్యతిరేకంగా ప్రవర్తించినందుకు గాను, ఎస్సీ, ఎస్టీ వేధింపుల చట్టం కింద వారికి ఈ శిక్ష విధిస్తున్నట్టు ఆయన ప్రకటించారు.

సుప్రీం కోర్టు జడ్జిలపై అవినీతి ఆరోపణలు చేసిన జస్టిస్ కర్ణన్ పై ఈ ఏడాది మార్చి 17న కోర్టు ధిక్కార నేరం కింద బెయిలబుల్ వారెంట్ ను  జారీ చేశారు. ఆయన మానసిక పరిస్థితి సరిగా లేదని, న్యాయసంబంధమైన విధులు నిర్వహించేందుకు కుదరదని సుప్రీంకోర్టు బెంచ్ నాడు ఆదేశించింది. ఈ ఆదేశాలను వెనక్కి తీసుకోవాలన్న కర్ణన్ డిమాండ్ ను సుప్రీంకోర్టు పట్టించుకోలేదు. కోల్ కతాలోని ప్రభుత్వ ఆసుపత్రి నియమించిన వైద్యుల బ‌ృందం సమక్షంలో కర్ణన్ కు  వైద్య పరీక్షలు నిర్వహించాలని ఈ నెల 1వ తేదీన అత్యున్నత న్యాయస్థానం ఆదేశించింది.

అయితే, మానసిక వైద్య పరీక్షలు చేయించుకునేందుకు ఆయన తిరస్కరించారు. తన మానసిక పరిస్థితి చాలా చక్కగా ఉందని ఆ వైద్యుల బృందానికి కర్ణన్ చెప్పడం జరిగింది. ఈ ఆదేశాలు జారీ చేసిన సుప్రీం ప్రధాన న్యాయమూర్తి (సీజేఐ) జేఎస్ ఖేర్ కర్ కు, ధర్మాసనంలోని జడ్జిలకే మతిస్థిమితం నిమిత్తం వైద్య పరీక్షలు నిర్వహించాలని కర్ణన్ ఆదేశించారు.