సివిల్స్‌ ‘గురు’!

9 Views
admin
June 2, 2017
Home Slider తాజా వార్తలు యువత రాష్ట్రీయం

శిక్షణార్థులకు రాచకొండ కమిషనర్‌ మహేశ్‌ భగవత్‌ మెళకువలు

హైదరాబాద్‌: ఆయనో సీనియర్‌ ఐపీఎస్‌ అధికారి.. దేశంలోనే అత్యధిక విస్తీర్ణం కలిగిన కమిషనరేట్‌కు బాస్‌.. నిత్యం శాంతిభద్రతల పర్యవేక్షణలో తలమునకలై ఉంటారు. అయినా.. సివిల్స్‌కు సన్నద్ధమయ్యే అభ్యర్థులకు గురువు అవతారమెత్తారు. సివిల్స్‌లో కీలకమైన ఇంటర్వ్యూకు హాజరయ్యే వారికి సలహాలు, సూచనలు అందిస్తుంటారు. ఆయనే రాచకొండ పోలీస్‌ కమిషనర్‌ మహేశ్‌ భగవత్‌. ఆయన సలహాలు తీసుకున్న 300 మందిలో 84 మంది ఇటీవలి సివిల్స్‌ ఫలితాల్లో అర్హత సంపాదించారు. తెలంగాణ, ఏపీ, మహారాష్ట్ర, తమిళనాడు, కర్ణాటక తదితర రాష్ట్రాల అభ్యర్థులతో ఆయన వాట్సప్‌ గ్రూపులు ఏర్పాటు చేశారు. ఎప్పటికప్పుడు వారికి అవసరమైన సలహాలు అందించడంతోపాటు సందేహాలను నివృత్తి చేశారు. ఆయన సలహాలు పొందిన వారిలో పుణెకు చెందిన వైష్ణవి గైక్వాడ్‌ 11వ ర్యాంకు సాధించడం విశేషం. తొలి 100 ర్యాంకుల్లో ఆరుగురు స్థానం పొందారు. ఏసీబీ మాజీ డీజీ ఏకే ఖాన్‌ తనయుడు ముజమిల్‌ఖాన్‌ 22వ ర్యాంకు, ఒంగోలుకు చెందిన రిజ్వాన్‌బాషా షేక్‌ 48, స్వప్నిల్‌ పాటిల్‌ 55, అన్వేష్‌రెడ్డి 80, పర్జీత్‌ నాయర్‌ 87, శోడిశెట్టి మాధవి 104, పోలుమెట్ల అభిషేక్‌ 373, కపిల్‌ జీబీ గేడ్‌ 401, శరత్‌చంద్ర అర్రోజు 425, వాసగిరి శిల్ప 547, రంజిత్‌ 555, మధుసూదన్‌రావు 588, కుమార్‌ చింత 608, పిన్నని సందీప్‌కుమార్‌ 732, నర్ర చైతన్య 733, బి.రవితేజ 741, కాపల పవన్‌కుమార్‌ 799, నరేశ్‌ మన్నే 979, ప్రేమ్‌ప్రకాశ్‌ 1015, శాలిని 1047 ర్యాంకు సాధించారు. ప్రస్తుతం ఐఆర్‌ఎస్‌గా ఉన్న నిశాంతి ఈసారి 233వ ర్యాంకుతో సత్తా చాటారు.

ఇంతకన్నా సంతోషం ఏముంటుంది?: భగవత్‌
మొత్తం 1099 మంది సివిల్స్‌కు ఎంపికైతే వారిలో నేను సలహాలిచ్చిన 84 మంది ఉండడం సంతోషకరం. ఒక మార్గదర్శిగా నాకింతకన్నా ఏం కావాలి..? ఇక ముందూ సివిల్స్‌ అభ్యర్థులకు సూచనలిస్తా. ఇంటర్వ్యూ ఎలిమినేషన్‌ రౌండ్‌ కావడంతో అభ్యర్థులు ఓపిగ్గా వ్యవహరించాలి.