న్యూదిల్లీ: పవిత్ర అమర్‌నాథ్‌ యాత్రలో విషాదం చోటుచేసుకుంది. అమరనాథ్‌ యాత్రికులను లక్ష్యంగా చేసుకొని ఉగ్రవాదులు పెట్రేగిపోయారు. జమ్మూ కశ్మీర్‌లోని అనంతనాగ్‌ బటింగు ప్రాంతంలో యాత్రికులు ప్రయాణిస్తున్న బస్సుపై కాల్పులకు తెగబడ్డారు. ముష్కరులు బహిరంగంగా జరిపిన కాల్పుల్లో ఏడుగురు యాత్రికులు ప్రాణాలు కోల్పోయినట్టు తెలుస్తోంది. 12 మందికిపైగా యాత్రికులు గాయపడ్డారు. పోలీసు బృందం భద్రతతో వెళ్తున్న బస్సుపైనే కాల్పులకు తెగబడ్డారు. ఈ ఘటనలో ఇద్దరు భద్రతా సిబ్బందికి సైతం గాయాలైనట్టు సమాచారం. దీంతో ఉధంపూర్‌లోని జమ్మూ కశ్మీర్‌ రహదారి వద్ద భారీగా భద్రతా బలగాలను మోహరించారు.

ప్రధాని నరేంద్ర మోదీ, హోంశాఖ మంత్రి రాజ్‌నాథ్‌సింగ్‌ కేంద్ర భద్రతా సలహాదారు అజిత్‌ ధోవల్‌తో పరిస్థితిపై నిరంతరం సమీక్ష జరుపుతున్నారు. ఇంకా భద్రతా బలగాలను అవకాశం ఉన్న మేరకు అనంతనాగ్‌ ప్రాంతానికి తరలించేందుకు అన్ని చర్యలు తీసుకోవాల్సిందిగా ఆదేశించారు. యాత్రికులు ఆందోళనకు గురికాకుండా సురక్షిత ప్రాంతాలకు వారిని చేర్చాలని హోంమంత్రిత్వ శాఖ స్పష్టమైన ఆదేశాలు జారీ చేసింది.